തിരുവന്തപുരം: തലസ്ഥാനനഗരിയെ ഒട്ടാകെ ഉത്സവലഹരിയിലാക്കി 63-ാമത് സംസ്ഥാന സ്കൂള് കലോത്സവത്തിന്റ ആദ്യദിവസം 24 വേദികളിലായി 58 ഇനങ്ങളാണ് പൂര്ത്തിയാകുന്നത്. ഹയര് സെക്കന്ഡറി വിഭാഗത്തില് 23 ഇനങ്ങളും ഹൈസ്കൂള് വിഭാഗത്തില് 22 ഇനങ്ങളും അരങ്ങേറി. സംസ്കൃതം കലോത്സവത്തില് ഏഴ് ഇനങ്ങളും അറബിക് കലോത്സവത്തില് ആറ് ഇനങ്ങളും പൂര്ത്തിയാകുന്നു. 14 ജില്ലകളില് നിന്നുള്ള ഷെഡ്യൂള്ഡ് മത്സര ഇനങ്ങളെ കൂടാതെ കോടതി വഴി 42 ഇനങ്ങളും (ഹൈകോടതി -23, മുന്സിഫ് കോടതി -5, ജില്ലാ കോടതി -6, ലോകായുക്ത -8) ഡെപ്യൂട്ടി ഡയറക്ടേഴ്സ് മുഖാന്തരം 146, ബാലാവകാശ കമീഷന് വഴി വന്ന ഒരിനവും ഉൾപ്പടെ 189 ഇനങ്ങള് മേളയില് അധികമായി ഉള്പ്പെട്ടിട്ടുണ്ട്.
ഹൈസ്കൂള് പെണ്കുട്ടികളുടെ മോഹിനിയാട്ടം, കുച്ചുപ്പുടി, ലളിതഗാനം, ഹൈസ്കൂള് ആണ്കുട്ടികളുടെ കഥകളി, ലളിതഗാനം എന്നീ മല്സരങ്ങളും ഹയര് സെക്കണ്ടറി പെണ്കുട്ടികളുടെ സംഘനൃത്തം, ഭരതനാട്യം മല്സരങ്ങളും ഇന്ന് നടന്നു. ഹയര് സെക്കണ്ടറി വിഭാഗത്തിലെ ഒപ്പന, സംഘഗാനം, ദേശഭക്തിഗാനം, കഥകളി ഗ്രൂപ്പ്, പഞ്ചവാദ്യം, അറബന മുട്ട്, ഉറുദു ഗസല് ആലാപനം മല്സരങ്ങളും ഉണ്ടായിരുന്നു. ഹൈസ്കൂള് വിഭാഗത്തിലെ മാര്ഗംകളി, സംസ്കൃത നാടകം, അറബനമുട്ട്, ചാക്യാര് കൂത്ത്, നങ്ങ്യാര് കൂത്ത്, നാദസ്വരം, പഞ്ചവാദ്യം മല്സരങ്ങള് നടന്നു.