തിരുവനന്തപുരം: തിരുവനന്തപുരം കോർപ്പറേഷൻ തെരഞ്ഞെടുപ്പ് ഫലത്തിൽ പ്രതികരണവുമായി മുതിർന്ന കോൺഗ്രസ് നേതാവ് കെ. മുരളീധരൻ. നഗരസഭയിൽ ഭരണം നടത്താനുള്ള ജനവിധി യുഡിഎഫിന് ലഭിച്ചിട്ടില്ലെന്നും അതിനാൽ അത് അട്ടിമറിക്കാൻ തങ്ങൾ ശ്രമിക്കില്ലെന്നും അദ്ദേഹം വ്യക്തമാക്കി. ജനവിധി മാനിച്ചുകൊണ്ട് നഗരസഭയിൽ ശക്തവും ക്രിയാത്മകവുമായ പ്രതിപക്ഷമായി യുഡിഎഫ് പ്രവർത്തിക്കുമെന്ന് മുരളീധരൻ പറഞ്ഞു.
ഭരണം ലഭിച്ചില്ലെങ്കിലും ജനങ്ങളുടെ പ്രശ്നങ്ങൾ ഏറ്റെടുക്കുന്നതിൽ വിട്ടുവീഴ്ചയുണ്ടാകില്ല. എന്നും ജനങ്ങൾക്കൊപ്പം നിലയുറപ്പിക്കാനാണ് യുഡിഎഫ് തീരുമാനം.
തൃശ്ശൂരിലെ സാഹചര്യങ്ങളെക്കുറിച്ചും അദ്ദേഹം തുറന്നുപറഞ്ഞു. സുരേഷ് ഗോപി എം.പി ആയതിനെത്തുടർന്നുണ്ടായ തരംഗമാണ് അവിടെ യുഡിഎഫിന് അനുകൂലമല്ലാത്ത സാഹചര്യം സൃഷ്ടിച്ചതെന്ന് അദ്ദേഹം വിലയിരുത്തി.
"ബിജെപിയുടെ രാഷ്ട്രീയം ആറുമാസം കഴിയുമ്പോൾ ജനങ്ങൾ തിരിച്ചറിയും. എൽഡിഎഫിന് കേരളത്തിൽ ആകെയുള്ള ഏക ബദൽ യുഡിഎഫ് മാത്രമാണ്." - കെ. മുരളീധരൻ അവകാശപ്പെട്ടു.
സംസ്ഥാന രാഷ്ട്രീയത്തിൽ ബിജെപിയുടെ വളർച്ച താൽക്കാലികം മാത്രമാണെന്നും വരാനിരിക്കുന്ന നിയമസഭാ തെരഞ്ഞെടുപ്പിൽ യുഡിഎഫ് ശക്തമായി തിരിച്ചുവരുമെന്നും അദ്ദേഹം പ്രത്യാശ പ്രകടിപ്പിച്ചു.