കൊച്ചി: തദ്ദേശ തിരഞ്ഞെടുപ്പിൽ യുഡിഎഫ് നേടിയ വിജയത്തെ 'ചരിത്രപരമായ മുന്നേറ്റം' എന്നാണ് രാഹുൽ ഗാന്ധി വിശേഷിപ്പിച്ചത്. രാജ്യത്തിന്റെ ജനാധിപത്യത്തെ നിശബ്ദമാക്കാൻ ശ്രമിക്കുന്ന ശക്തികൾക്കുള്ള ശക്തമായ മറുപടിയാണിതെന്ന് അദ്ദേഹം പറഞ്ഞു. കൊച്ചിയിൽ സംസാരിക്കുകയായിരുന്നു അദ്ദേഹം.(It is certain that UDF will come to power in Kerala, Rahul Gandhi in Kochi)
ബിജെപിയും ആർഎസ്എസും ഇന്ത്യയുടെ വൈവിധ്യങ്ങളെയും പ്രാദേശിക ശബ്ദങ്ങളെയും നിശബ്ദമാക്കാൻ ശ്രമിക്കുകയാണ്. സ്വന്തം ആശയങ്ങൾ രാജ്യത്തിന് മേൽ അടിച്ചേൽപ്പിക്കാനാണ് അവരുടെ ശ്രമം. ഇന്ത്യയുടെ അഭിമാനവും സ്വത്തും ചുരുക്കം ചില വ്യക്തികളുടെ കൈകളിലേക്ക് മാത്രം ഒതുങ്ങണമെന്നാണ് ബിജെപി ആഗ്രഹിക്കുന്നത്. ഇതിനെതിരെ ജനങ്ങൾ ജാഗരൂകരാകണം എന്നും അദ്ദേഹം കൂട്ടിച്ചേർത്തു.
മലയാളിയുടെ ശബ്ദം അടിച്ചമർത്താൻ കഴിയില്ലെന്ന് തദ്ദേശ തിരഞ്ഞെടുപ്പ് തെളിയിച്ചു. കേരളത്തിൽ അടുത്തതായി യുഡിഎഫ് അധികാരത്തിൽ വരുമെന്നത് ഉറപ്പാണെന്നും അദ്ദേഹം പ്രത്യാശ പ്രകടിപ്പിച്ചു. അടുത്ത യുഡിഎഫ് സർക്കാർ ജനങ്ങൾക്ക് കയ്യെത്തും ദൂരത്തുള്ള ഒന്നായിരിക്കണം. തൊഴിലില്ലായ്മ പരിഹരിക്കുക എന്നതിനായിരിക്കണം പ്രധാന മുൻഗണന നൽകേണ്ടത്. ജനങ്ങളുമായി ഇഴുകിച്ചേർന്ന് അവരുടെ പ്രശ്നങ്ങൾ കേൾക്കുന്ന ഒരു ഭരണമായിരിക്കും യുഡിഎഫിന്റേതെന്നും രാഹുൽ ഉറപ്പുനൽകി.