തിരുവനന്തപുരം: കഴക്കൂട്ടത്ത് ഹോസ്റ്റൽ മുറിയിൽ കയറി ടെക്‌നോപാർക്കിലെ ഐ.ടി. കമ്പനി ജീവനക്കാരിയായ യുവതിയെ പീഡിപ്പിച്ചതായി പരാതി. വെള്ളിയാഴ്ച രാവിലെയാണ് സംഭവം നടന്നത്. യുവതി നൽകിയ പരാതി പ്രകാരം, ഉറങ്ങിക്കിടക്കുകയായിരുന്ന യുവതിയുടെ മുറിയിലേക്ക് പ്രതി വാതിൽ തള്ളിത്തുറന്ന് അകത്തുകയറി പീഡിപ്പിക്കാൻ ശ്രമിക്കുകയായിരുന്നു.
ഞെട്ടിയുണർന്ന യുവതി ബഹളം വെച്ചതോടെ അക്രമി ഉടൻ തന്നെ ഓടിരക്ഷപ്പെട്ടു. തുടർന്ന് യുവതി കഴക്കൂട്ടം പോലീസിൽ പരാതി നൽകുകയായിരുന്നു. സംഭവത്തിൽ കഴക്കൂട്ടം പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. ഹോസ്റ്റൽ പരിസരത്തെ സി.സി.ടി.വി. ദൃശ്യങ്ങൾ ഉൾപ്പെടെ പോലീസ് പരിശോധിക്കുന്നുണ്ട്.
എങ്കിലും, തന്നെ ഉപദ്രവിച്ചയാളെ തിരിച്ചറിയാൻ കഴിഞ്ഞില്ലെന്നാണ് യുവതിയുടെ പ്രാഥമിക മൊഴി. ഐ.ടി. മേഖലയിലെ വനിതാ ജീവനക്കാർ ധാരാളമായി താമസിക്കുന്ന ഹോസ്റ്റൽ പരിസരത്ത് നടന്ന ഈ സംഭവം മേഖലയിലെ സുരക്ഷാ ആശങ്കകൾ വർദ്ധിപ്പിച്ചിരിക്കുകയാണ്.