തിരുവനന്തപുരം: ശബരിമല സ്വർണ്ണക്കൊള്ള കേസിലെ മുഖ്യകണ്ണിയായ ഡി മണിയും സംഘവും കേരളത്തിലെ പ്രമുഖ ക്ഷേത്രങ്ങളെ ലക്ഷ്യമിട്ട് ആയിരം കോടി രൂപയുടെ വൻ അഴിമതിക്ക് പദ്ധതിയിട്ടിരുന്നതായി വെളിപ്പെടുത്തൽ. ശബരിമലയ്ക്ക് പുറമെ തിരുവനന്തപുരം പത്മനാഭസ്വാമി ക്ഷേത്രത്തിലെ വിഗ്രഹങ്ങളും ആഭരണങ്ങളും കടത്താൻ സംഘം ലക്ഷ്യമിട്ടിരുന്നതായാണ് പ്രവാസി വ്യവസായി പ്രത്യേക അന്വേഷണ സംഘത്തിന് (SIT) നൽകിയ മൊഴിയിൽ പറയുന്നത്.(Investigation focusing on D Mani in Sabarimala gold theft case)
2017 മുതൽ 2023 വരെയുള്ള കാലയളവിൽ കേരളത്തിലെ ക്ഷേത്രങ്ങളിൽ നിന്ന് വിഗ്രഹങ്ങളും സ്വർണ്ണവും കടത്താനുള്ള കൃത്യമായ 'മാസ്റ്റർ പ്ലാൻ' ഡി മണിയുടെ നേതൃത്വത്തിലുള്ള സംഘം തയ്യാറാക്കിയിരുന്നു. പത്മനാഭസ്വാമി ക്ഷേത്രത്തിലെ വിഗ്രഹങ്ങൾ കടത്താൻ സംഘം ശ്രമിച്ചെങ്കിലും ചില കാരണങ്ങളാൽ ആ ഇടപാട് മുടങ്ങിപ്പോകുകയായിരുന്നു.
ശബരിമല കൂടാതെ പല പ്രമുഖ ഉപക്ഷേത്രങ്ങളിലും സംഘം തങ്ങളുടെ സ്വാധീനം ഉറപ്പിക്കാൻ ശ്രമിച്ചിരുന്നു. ഈ നീക്കങ്ങളിൽ ഉൾപ്പെട്ട മറ്റുള്ളവരെക്കുറിച്ചും എസ്ഐടി വിവരശേഖരണം ആരംഭിച്ചു. പണം കൈമാറിയത് 2020-ൽ ശബരിമലയിൽ നിന്ന് സ്വർണ്ണത്തിന് പുറമെ പഞ്ചലോഹ വിഗ്രഹങ്ങളും കടത്തിയതായി മൊഴിയുണ്ട്.
2020 ഒക്ടോബർ 20-ന് തിരുവനന്തപുരത്ത് വെച്ച് പണം കൈമാറ്റം നടന്നതായി പ്രവാസി വ്യവസായി മൊഴി നൽകി. പണം കൈമാറുന്ന സമയത്ത് ശബരിമലയിലെ ഒരു ഉന്നതനും, ഉണ്ണികൃഷ്ണൻ പോറ്റിയും, ഡി മണിയും മാത്രമാണ് ഉണ്ടായിരുന്നത്. ഈ ഉന്നതൻ ആരാണെന്നത് സംബന്ധിച്ച് എസ്ഐടി കൂടുതൽ അന്വേഷണം നടത്തിവരികയാണ്.
ചെന്നൈയിൽ നിന്ന് പിടിയിലായ ഡിണ്ടിഗൽ സ്വദേശി ബാലമുരുകനാണ് ഡി മണിയെന്ന് അന്വേഷണ സംഘം കണ്ടെത്തിയിരുന്നു. അന്താരാഷ്ട്ര വിഗ്രഹക്കടത്ത് സംഘത്തിന്റെ തലവനായാണ് ഇയാൾ അറിയപ്പെടുന്നത്. ഇയാളെ തിരുവനന്തപുരത്തെത്തിച്ച് വിശദമായി ചോദ്യം ചെയ്യുന്നതോടെ കൂടുതൽ വമ്പന്മാരുടെ പേരുകൾ പുറത്തുവരുമെന്നാണ് സൂചന.