കോഴിക്കോട്: മാധ്യമപ്രവർത്തകരോട് താൻ നടത്തിയ 'കടക്ക് പുറത്ത്' എന്ന പരാമർശത്തിന് വിശദീകരണവുമായി മുഖ്യമന്ത്രി പിണറായി വിജയൻ. വിളിക്കാത്ത സ്ഥലങ്ങളിൽ പോയിരുന്ന മാധ്യമപ്രവർത്തകരെ ഉദ്ദേശിച്ചാണ് താൻ ആ പരാമർശം നടത്തിയതെന്ന് അദ്ദേഹം വ്യക്തമാക്കി.(Intended for those who went to uninvited places, CM on his controversial remark)
"വിളിക്കാത്ത സ്ഥലങ്ങളിലല്ല പോയി ഇരിക്കേണ്ടത്. വിളിക്കാത്ത സ്ഥലത്ത് പോകാന് പാടില്ല," മുഖ്യമന്ത്രി ഊന്നിപ്പറഞ്ഞു. നിങ്ങൾ ദയവായി പുറത്ത് പോകൂ എന്ന് പറയുന്നതിന് പകരമായി താൻ അങ്ങനെ പറഞ്ഞിട്ടുണ്ടാകാം എന്നും അദ്ദേഹം കൂട്ടിച്ചേർത്തു.
2017 ജൂലൈ 31-ന് തിരുവനന്തപുരത്ത് വെച്ച് മുഖ്യമന്ത്രിയും ബി.ജെ.പി. നേതാക്കളും തമ്മിൽ നടത്തിയ സമാധാന ചർച്ചയ്ക്കിടെയാണ് വിവാദമായ 'കടക്ക് പുറത്ത്' പരാമർശം അദ്ദേഹം നടത്തിയത്. സി.പി.എം.-ബി.ജെ.പി.-ആർ.എസ്.എസ്. സംഘർഷങ്ങളുടെ പശ്ചാത്തലത്തിൽ ഗവർണറുടെ നിർദ്ദേശപ്രകാരമായിരുന്നു ചർച്ച സംഘടിപ്പിച്ചത്.
ചർച്ച നടക്കുന്ന മുറിയിൽ മാധ്യമപ്രവർത്തകരുണ്ടെന്ന് അറിഞ്ഞപ്പോൾ എല്ലാവരെയും പുറത്താക്കിയ മുഖ്യമന്ത്രി, മാധ്യമപ്രവർത്തകർ പുറത്തിറങ്ങുന്നതിനിടെ കയർത്ത് സംസാരിക്കുകയായിരുന്നു.