തിരുവനന്തപുരം: ശ്രീലങ്കൻ വനിതകൾക്കെതിരായ ട്വന്റി20 പരമ്പരയിലെ മൂന്നാം മത്സരത്തിലും തകർപ്പൻ ജയം നേടിയതോടെ അഞ്ച് മത്സരങ്ങളുള്ള പരമ്പര ഇന്ത്യ സ്വന്തമാക്കി (3-0). കാര്യവട്ടം ഗ്രീൻഫീൽഡ് സ്റ്റേഡിയത്തിൽ നടന്ന മത്സരത്തിൽ എട്ട് വിക്കറ്റിനായിരുന്നു ഇന്ത്യയുടെ വിജയം. ആദ്യ രണ്ട് മത്സരങ്ങളും ഇന്ത്യ നേരത്തെ വിജയിച്ചിരുന്നു.
ടോസ് നഷ്ടപ്പെട്ട് ബാറ്റിംഗിനിറങ്ങിയ ശ്രീലങ്ക നിശ്ചിത ഓവറിൽ ഉയർത്തിയത് 113 റൺസ് എന്ന ചെറിയ ലക്ഷ്യമായിരുന്നു. മറുപടി ബാറ്റിംഗിനിറങ്ങിയ ഇന്ത്യക്കായി ഓപ്പണർ ഷെഫാലി വർമ്മ തകർത്തടിച്ചു. വെറും 42 പന്തിൽ നിന്ന് 79 റൺസാണ് ഷെഫാലി അടിച്ചുകൂട്ടിയത്. ഇന്നിംഗ്സിൽ 11 ബൗണ്ടറികളും 3 സിക്സറുകളും ഉൾപ്പെടുന്നു.
ഷെഫാലിയുടെ കരുത്തിൽ വെറും 13.2 ഓവറിൽ 2 വിക്കറ്റ് മാത്രം നഷ്ടപ്പെടുത്തി ഇന്ത്യ ലക്ഷ്യം കണ്ടു. ക്യാപ്റ്റൻ ഹർമൻപ്രീത് കൗർ 21 റൺസെടുത്ത് പുറത്താകാതെ നിന്നു.
പരമ്പര തൂത്തുവാരുക എന്ന ലക്ഷ്യത്തോടെയാകും ഇനി വരാനിരിക്കുന്ന രണ്ട് മത്സരങ്ങളിൽ ഇന്ത്യ ഇറങ്ങുക. തിരുവനന്തപുരത്തെ കാണികളെ ആവേശത്തിലാഴ്ത്തിയ പ്രകടനമായിരുന്നു ഇന്ത്യൻ വനിതകളുടേത്.