കൊല്ലം: പുനലൂർ കോട്ടവട്ടത്ത് പുലർച്ചെ വീടിന്റെ മേൽക്കൂര ഇടിഞ്ഞുവീണ് പന്ത്രണ്ട് വയസ്സുകാരന് പരിക്കേറ്റു. കോട്ടവട്ടം സ്വദേശി വിനോദിന്റെ വീടാണ് തകർന്നത്. ഇന്ന് പുലർച്ചെ മൂന്ന് മണിയോടെയായിരുന്നു അപകടം.(House collapses in Kollam, 12-year-old boy injured while sleeping)
വിനോദും ഭാര്യയും രണ്ട് മക്കളും വീട്ടിനുള്ളിൽ ഉറങ്ങിക്കിടക്കുമ്പോഴാണ് മേൽക്കൂര നിലംപതിച്ചത്. വീടിന്റെ ഒരു ഭാഗം പൂർണ്ണമായും തകർന്നു. സംഭവസമയത്ത് പ്രദേശത്ത് ശക്തമായ മഴയുണ്ടായിരുന്നു.
മൺകട്ട ഉപയോഗിച്ച് നിർമ്മിച്ച വീടിന്റെ ചുമരുകൾ നേരത്തെ തന്നെ വിണ്ടുകീറിയ നിലയിലായിരുന്നു. മേൽക്കൂരയിൽ ചോർച്ചയുണ്ടായിരുന്നതിനാൽ ടാർപ്പോളിൻ കെട്ടിയാണ് കുടുംബം കഴിഞ്ഞിരുന്നത്. കാലപ്പഴക്കവും മഴയുമാണ് അപകടത്തിന് കാരണമായത്. പരിക്കേറ്റ പന്ത്രണ്ടുകാരനെ ഉടൻ തന്നെ ആശുപത്രിയിൽ പ്രവേശിപ്പിച്ചു.
