തിരുവനന്തപുരം: വീടിനുള്ളിൽ രഹസ്യമായി കഞ്ചാവ് ചെടികൾ വളർത്തിയ യുവാവിനെ സിറ്റി ഡാൻസാഫ് (DANSAF) സംഘം പിടികൂടി. വലിയതുറ തോപ്പിനകം സ്വദേശി ധനുഷ് (26) ആണ് അറസ്റ്റിലായത്. വീടിന്റെ വരാന്തയിലുള്ള ഷൂറാക്കിനുള്ളിൽ പ്രത്യേക സജ്ജീകരണങ്ങളോടെയാണ് ഇയാൾ കഞ്ചാവ് വളർത്തിയിരുന്നത്.
കഞ്ചാവ് ചെടികൾക്ക് ആവശ്യമായ കൃത്രിമ പ്രകാശം (Artificial lighting), വായുസഞ്ചാരത്തിനായി എക്സ്ഹോസ്റ്റ് ഫാനുകൾ എന്നിവ ഷൂറാക്കിനുള്ളിൽ സജ്ജീകരിച്ചിരുന്നു. പുറംലോകം അറിയാത്ത രീതിയിലായിരുന്നു ഈ സജ്ജീകരണം.പ്ലാസ്റ്റിക് ബോക്സുകളിലും ഗ്രോബാഗുകളിലുമായി വളർത്തിയ ഒൻപതോളം കഞ്ചാവ് ചെടികളാണ് പോലീസ് കണ്ടെടുത്തത്. ചെടികൾക്ക് ആവശ്യമായ വളവും വെള്ളവും കൃത്യമായി നൽകി പരിപാലിച്ചു വരികയായിരുന്നു.
സിറ്റി പോലീസ് കമ്മീഷണർക്ക് ലഭിച്ച രഹസ്യവിവരത്തെത്തുടർന്ന് ഡാൻസാഫും വലിയതുറ പോലീസും സംയുക്തമായി നടത്തിയ പരിശോധനയിലാണ് ഈ 'ഹൈടെക്' തോട്ടം കണ്ടെത്തിയത്.പിടിയിലായ ധനുഷ് നേരത്തെയും ലഹരിക്കേസുകളിൽ പ്രതിയാണെന്ന് പോലീസ് അറിയിച്ചു. ഇയാൾ വിദേശ രാജ്യങ്ങളിൽ പ്രചാരത്തിലുള്ള ഇൻഡോർ ഫാമിംഗ് രീതിയാണ് ഇവിടെ അനുകരിക്കാൻ ശ്രമിച്ചതെന്ന് കരുതുന്നു. ഇയാൾക്ക് ലഹരിമരുന്ന് വിൽപന സംഘങ്ങളുമായി ബന്ധമുണ്ടോയെന്ന് പോലീസ് അന്വേഷിച്ചുവരികയാണ്.