'അവർക്ക് ചില പ്രധാന കാര്യങ്ങൾ പറയാനുണ്ട്, അത് കേട്ടിട്ടു പോരെ എന്ന് കോടതി ചോദിച്ചു': രാഹുൽ മാങ്കൂട്ടത്തിലിന്റെ അഭിഭാഷകൻ | Rahul Mamkootathil

കൊച്ചി: ബലാത്സംഗക്കേസുമായി ബന്ധപ്പെട്ട് എം.എൽ.എ രാഹുൽ മാങ്കൂട്ടത്തിലിന്റെ (Rahul Mamkootathil) അറസ്റ്റ് ഹൈക്കോടതി താൽക്കാലികമായി തടഞ്ഞതിനെക്കുറിച്ച് പ്രതികരിച്ച് അഭിഭാഷകൻ എസ്. രാജീവ് രംഗത്തെത്തി. പൂർണമായും വാദം കേൾക്കാതെ ഒരാളെയും അറസ്റ്റ് ചെയ്യരുതെന്നും, കോടതിക്ക് കേസിൽ മുൻവിധിയില്ലെന്നും വ്യക്തമാക്കിക്കൊണ്ടാണ് ജസ്റ്റിസ് കെ. ബാബു അറസ്റ്റ് തടഞ്ഞതെന്ന് അഭിഭാഷകൻ പറഞ്ഞു.

"കോടതിക്ക് മുൻപാകെ ജാമ്യാപേക്ഷ നിൽക്കുമ്പോൾ അറസ്റ്റ് ചെയ്യാതിരിക്കുക എന്നത് ഒരു സാധാരണ നടപടിക്രമമാണ്. അവർക്ക് (പ്രതിഭാഗത്തിന്) ചില പ്രധാന കാര്യങ്ങൾ പറയാനുണ്ട്, അത് കേട്ടിട്ട് പോരെ എന്നാണ് കോടതി ചോദിച്ചത്. ഡിസംബർ 15 വരെ അറസ്റ്റ് ചെയ്യരുതെന്നും നിർദ്ദേശിച്ചു."– എസ്. രാജീവ് വ്യക്തമാക്കി.

അതേസമയം, കോടതിയുടെ നിർദ്ദേശപ്രകാരം അന്വേഷണം തടയുകയോ ഒന്നും ചെയ്തിട്ടില്ല. കോടതി എപ്പോൾ ഹാജരാകാൻ പറഞ്ഞാലും രാഹുൽ മാങ്കൂട്ടത്തിൽ ഹാജരായിരിക്കും.

പോലീസ് സ്റ്റേഷനിൽ ഹാജരാകുന്നതിലെ ആശങ്ക

ഒരു പോലീസ് സ്റ്റേഷനിൽ ചെന്ന് ധൈര്യമായി തെളിവു ഹാജരാക്കാൻ നിലവിൽ സാധ്യമല്ലെന്ന് അഭിഭാഷകൻ ആരോപിച്ചു. കാരണം, "അപ്പോൾ തന്നെ അറസ്റ്റ് ചെയ്ത് ജയിലിൽ ഇടും. പിന്നെയല്ലേ തെളിവു ചോദിക്കൂ." കേസ് എടുത്തപ്പോൾ മുതൽ സെഷൻസ് കോടതി മുമ്പാകെ ഹർജിയുണ്ട്. ഇതുവരെ ഹാജരാകാൻ നോട്ടിസ് നൽകിയിട്ടില്ല. കോടതിയോ അന്വേഷണ ഉദ്യോഗസ്ഥനോ ആവശ്യപ്പെട്ടാൽ ഹാജരാകാൻ തയ്യാറാണെന്നും രാജീവ് കൂട്ടിച്ചേർത്തു.