കൊച്ചി: ശബരിമല സ്വർണ്ണക്കവർച്ചാ കേസിൽ അറസ്റ്റിലായ ദേവസ്വം ബോർഡ് മുൻ പ്രസിഡന്റ് എ. പത്മകുമാർ ഉൾപ്പെടെ മൂന്ന് പ്രതികൾക്ക് ഹൈക്കോടതി ജാമ്യം നിഷേധിച്ചു. പത്മകുമാറിന് പുറമെ മുരാരി ബാബു, ബെല്ലാരിയിലെ സ്വർണ്ണ വ്യാപാരി ഗോവർധൻ എന്നിവരുടെ ജാമ്യാപേക്ഷകളാണ് ജസ്റ്റിസ് എ. ബദറൂദ്ദീന്റെ ബെഞ്ച് തള്ളിയത്.
പ്രതികൾക്കെതിരെ പ്രഥമദൃഷ്ട്യാ ഗൗരവമായ തെളിവുകളുണ്ടെന്ന് കോടതി നിരീക്ഷിച്ചു. കേസിന്റെ അന്വേഷണം നിർണ്ണായക ഘട്ടത്തിലാണെന്നും ഈ സമയത്ത് പ്രതികൾക്ക് ജാമ്യം നൽകുന്നത് തെളിവുകൾ നശിപ്പിക്കപ്പെടാൻ ഇടയാക്കുമെന്ന പ്രോസിക്യൂഷൻ വാദം കോടതി അംഗീകരിച്ചു.
ഉന്നത സ്വാധീനമുള്ള പ്രതികൾ പുറത്തിറങ്ങുന്നത് സാക്ഷികളെ ഭയപ്പെടുത്താൻ കാരണമാകുമെന്ന് സർക്കാർ കോടതിയെ അറിയിച്ചു.
പത്മകുമാറിന്റെ അറസ്റ്റ് ശ്രീകോവിലിലെ സ്വർണ്ണക്കട്ടിളപ്പാളി കേസിൽ ഉണ്ണിക്കൃഷ്ണൻ പോറ്റിക്ക് സ്വർണ്ണം കൈമാറുന്നതിൽ വഴിവിട്ട ഇടപെടൽ നടത്തിയെന്ന കണ്ടെത്തലിനെത്തുടർന്ന് കഴിഞ്ഞ നവംബർ 20-നാണ് പ്രത്യേക അന്വേഷണ സംഘം (SIT) പത്മകുമാറിനെ അറസ്റ്റ് ചെയ്തത്.
ദ്വാരപാലക ശില്പങ്ങളിലെ സ്വർണ്ണം മോഷ്ടിച്ച കേസിൽ ഒന്നാം പ്രതിയായ ഉണ്ണിക്കൃഷ്ണൻ പോറ്റിക്ക് കൊല്ലം വിജിലൻസ് കോടതി സ്വാഭാവിക ജാമ്യം അനുവദിച്ചിരുന്നു. 90 ദിവസം പിന്നിട്ടിട്ടും കുറ്റപത്രം സമർപ്പിക്കാത്തതിനാലായിരുന്നു ഇത്. എന്നാൽ, കട്ടിളപ്പാളി കേസിൽ ജാമ്യം ലഭിക്കാത്തതിനാൽ പോറ്റിക്ക് നിലവിൽ ജയിൽ മോചിതനാകാൻ കഴിയില്ല. ഹൈക്കോടതി വിധി കൂടി വന്നതോടെ കേസിൽ ഉൾപ്പെട്ട പ്രമുഖരെല്ലാം അഴിക്കുള്ളിൽ തുടരേണ്ടി വരും.