തിരുവനന്തപുരം: സംസ്ഥാനത്ത് ഇന്നും ഒറ്റപ്പെട്ടയിടങ്ങളിൽ ശക്തമായ മഴയ്ക്ക് സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു. ഡിറ്റ് വാ ചുഴലിക്കാറ്റിന്റെ സ്വാധീനഫലമായാണ് കേരളത്തിൽ മഴ തുടരുന്നത്. ഇന്ന് പത്തനംതിട്ട, ഇടുക്കി, പാലക്കാട്, മലപ്പുറം, വയനാട് ജില്ലകളിൽ യെല്ലോ അലേർട്ട് പ്രഖ്യാപിച്ചിട്ടുണ്ട്.(Heavy rains expected in the Kerala today, Yellow alert in 5 districts)
കേരള, ലക്ഷദ്വീപ് തീരങ്ങളിൽ മത്സ്യബന്ധനത്തിന് പൂർണ്ണമായും വിലക്കേർപ്പെടുത്തിയിട്ടുണ്ട്. കള്ളക്കടൽ പ്രതിഭാസത്തിന്റെ ഭാഗമായി കടലാക്രമണത്തിന് സാധ്യതയുള്ളതിനാൽ മത്സ്യത്തൊഴിലാളികളും തീരദേശവാസികളും ജാഗ്രത പാലിക്കണം. ഇടിമിന്നലോടും കാറ്റോടും കൂടിയ മഴയ്ക്കാണ് സംസ്ഥാനത്ത് സാധ്യത.
ശ്രീലങ്കയിൽ കനത്ത നാശനഷ്ടമുണ്ടാക്കിയതിന് ശേഷം ഡിറ്റ് വാ ചുഴലിക്കാറ്റ് ഇപ്പോൾ തമിഴ്നാട് തീരത്തേക്ക് നീങ്ങുകയാണ്. ഡിറ്റ് വായുടെ സ്വാധീനത്തിൽ തമിഴ്‌നാട്ടിലെ തെക്കൻ ജില്ലകളിലും പുതുച്ചേരിയിലും അടുത്ത മൂന്ന് ദിവസത്തേക്ക് കനത്ത മഴ തുടരാൻ സാധ്യതയുണ്ടെന്നാണ് മുന്നറിയിപ്പ്.
ആന്ധ്രാപ്രദേശ്, പുതുച്ചേരി തീരങ്ങളിലും കനത്ത ജാഗ്രത പ്രഖ്യാപിച്ചു. ദേശീയ ദുരന്ത നിവാരണ സേനയുടെ (NDRF) യും സംസ്ഥാന ദുരന്ത നിവാരണ സേനയുടെയും (SDRF) സംഘങ്ങളെ വിവിധ ജില്ലകളിൽ വിന്യസിച്ചു കഴിഞ്ഞു.
രണ്ട് ദിവസമായി തുടരുന്ന അതിതീവ്ര മഴയിൽ ശ്രീലങ്കൻ ദ്വീപ് രാജ്യം പൂർണ്ണമായും തകർന്നിരിക്കുകയാണ്. ഡിറ്റ് വാ ചുഴലിക്കാറ്റ് സൃഷ്ടിച്ച പ്രളയത്തിലും മണ്ണിടിച്ചിലിലുമായി മരണസംഖ്യ 100 കടന്നു. നിരവധി പേരെ കാണാതാവുകയും ചെയ്തിട്ടുണ്ട്. രാജ്യത്തെ 25 ജില്ലകളിൽ ഇരുപതിലും ജനജീവിതം നിശ്ചലമായി. പലയിടത്തും റോഡുകളും പാലങ്ങളും ഒലിച്ചുപോയി. ശ്രീലങ്കൻ സർക്കാരിന്റെ അഭ്യർത്ഥന പ്രകാരം ഇന്ത്യയുടെ യുദ്ധക്കപ്പലായ ഐഎൻഎസ് വിക്രാന്തും രക്ഷാദൗത്യത്തിൽ സജീവമായി പങ്കെടുക്കുന്നുണ്ട്.