ന്യൂഡൽഹി: ജീവിതത്തിലെ വേദനിപ്പിക്കുന്ന അനുഭവങ്ങൾ സോഷ്യൽ മീഡിയയിൽ പങ്കുവെക്കുന്നവർ ഏറെയുണ്ട്. അത്തരത്തിൽ, ഒരു സോഫ്റ്റ്‌വെയർ എൻജിനീയറുടെ 'എക്‌സ്' (മുമ്പ് ട്വിറ്റർ) പോസ്റ്റ് നെറ്റിസൺസിനെ കണ്ണീരിലാഴ്ത്തുകയാണ്. അച്ഛന്റെ മരണവാർത്തയറിഞ്ഞ് യാത്ര പുറപ്പെട്ട വിവേക് നസ്‌കർ എന്ന യുവാവിന്റെ കുറിപ്പാണ് വൈകാരിക തലം കൊണ്ട് ശ്രദ്ധേയമാകുന്നത്.
വൈകിയും ജോലി ചെയ്തിരുന്നതിനാൽ, അച്ഛൻ മരിച്ച വിവരം അറിയിക്കാൻ അമ്മ വിളിച്ച 20-ൽ അധികം കോളുകൾ താൻ അറിഞ്ഞില്ല എന്ന് പറഞ്ഞുകൊണ്ടാണ് വിവേക് കുറിപ്പ് ആരംഭിക്കുന്നത്.
"ഇന്ന് രാവിലെ എനിക്ക് എന്റെ അച്ഛനെ നഷ്ടപ്പെട്ടു. അമ്മയിൽ നിന്ന് 20-ൽ അധികം ഫോൺ കോളുകളാണ് എനിക്ക് വന്നിരുന്നത്, പക്ഷേ വൈകിയും ജോലി ചെയ്തതുകൊണ്ട് കോളുകൾ വന്നത് ഞാൻ അറിഞ്ഞില്ല. ഒടുവിൽ (രാവിലെ 8 മണിക്ക്) വിമാനത്തിന് ടിക്കറ്റ് എടുത്തു, എനിക്ക് കഴിയുന്നതിൽ ഏറ്റവും വേഗമെത്താനാവുന്ന ഫ്‌ലൈറ്റാണ് ഞാൻ ബുക്ക് ചെയ്തത്, പക്ഷേ അതുപോലും വൈകുന്നേരം 7 മണിക്ക് മാത്രമേ എത്തുകയുള്ളൂ," വിവേക് കുറിച്ചു.
നിയന്ത്രിക്കാനാവാതെ ചിന്തകൾ
രണ്ടാമത്തെ വിമാനത്തിനായി വിമാനത്താവളത്തിൽ കാത്തിരിക്കുമ്പോൾ, നൂറുകണക്കിന് ചിന്തകളാണ് തന്റെ മനസ്സിലൂടെ കടന്നുപോകുന്നതെന്ന് വിവേക് പറയുന്നു. തനിക്ക് ഏറ്റവും കുറ്റബോധം തോന്നുന്ന നിമിഷങ്ങളെക്കുറിച്ചും അദ്ദേഹം ഓർക്കുന്നു:
"അച്ഛൻ എന്നെ വിളിച്ചിരുന്നു. പക്ഷേ ഞാൻ വേണ്ടതുപോലെ സംസാരിച്ചിരുന്നില്ല. സംസാരിക്കേണ്ടതായിരുന്നു. എപ്പോഴും അദ്ദേഹത്തോടൊപ്പം എനിക്ക് ഒരുപാട് സമയം ഇനിയുമുണ്ടെന്നാണ് ഞാൻ കരുതിയിരുന്നത്. അവസാനം വിളിച്ചപ്പോൾ ചില വിയോജിപ്പുകളാണ് പങ്കുവെച്ചതെന്ന് തോന്നുന്നു. എന്നോട് പറഞ്ഞില്ലെങ്കിലും അദ്ദേഹം എന്നെച്ചൊല്ലി അഭിമാനിക്കുന്നുവെന്ന് അമ്മയോട് പറഞ്ഞിരുന്നു."
"ഞാൻ വൈകാരികമായി കാര്യങ്ങൾ ചെയ്യുന്ന ആളല്ല. പക്ഷേ ഇപ്പോൾ ഭാരിച്ച ഹൃദയത്തോടും നിറഞ്ഞ കണ്ണുകളോടെയുമാണ് ഇരിക്കുന്നത്. അമ്മയെയും സഹോദരിയെയും കാണുമ്പോൾ ഞാൻ ഇങ്ങനെയാവരുത്." – വിവേക് എഴുതുന്നു.
അച്ഛനെ അവസാനമായി ഒരുനോക്ക് കാണാനായി താൻ മാനസികമായി തയ്യാറെടുത്തുകൊണ്ടിരിക്കുകയാണ് എന്ന് പറഞ്ഞുകൊണ്ടാണ് ഈ ഹൃദയഭേദകമായ കുറിപ്പ് അദ്ദേഹം അവസാനിപ്പിക്കുന്നത്.
നെറ്റിസൺസിന്റെ പ്രതികരണം
വിവേകിന്റെ പോസ്റ്റ് വൈറലായതോടെ നിരവധി പേരാണ് അദ്ദേഹത്തിന് ആശ്വാസ വാക്കുകളുമായി എത്തിയത്. "നമ്മുടെ പ്രിയപ്പെട്ടവർക്ക് വേണ്ടി സമയം കണ്ടെത്തുക, പറ്റുന്നത്ര സ്‌നേഹത്തോടെ അവരോട് ഇടപെഴകുക" എന്ന ഓർമ്മപ്പെടുത്തലാണ് മിക്കവരും പങ്കുവെച്ചത്. സമയത്തിന്റെ വിലയേയും ബന്ധങ്ങളുടെ പ്രാധാന്യത്തെയും വിവേകിന്റെ വാക്കുകൾ വീണ്ടും ഓർമ്മിപ്പിക്കുന്നു.