കൊച്ചി: സംസ്ഥാനത്ത് സ്വർണവിലയിൽ വീണ്ടും വൻ ഇടിവ് രേഖപ്പെടുത്തി. ഇന്ന് ഒരു പവൻ സ്വർണത്തിന് 1440 രൂപയാണ് കുറഞ്ഞത്. ഇതോടെ സ്വർണവില 92,000 രൂപ എന്ന നിലയിൽ നിന്ന് താഴെയെത്തി. (Gold price in the state suddenly falls down)
പവന് 91,720 രൂപ എന്ന നിലയിലും, ഗ്രാമിന് 180 രൂപ കുറഞ്ഞ് 11,465 രൂപ എന്ന നിലയിലുമാണ് ഇന്ന് വിപണിയിൽ വ്യാപാരം നടക്കുന്നത്. തുടർച്ചയായ ദിവസങ്ങളിലെ ചാഞ്ചാട്ടത്തിനൊടുവിൽ സ്വർണ്ണവില ഇടിഞ്ഞത് ഉപഭോക്താക്കൾക്ക് നേരിയ ആശ്വാസം നൽകുന്നുണ്ട്.
രാജ്യാന്തര വിപണിയിലെ ചലനങ്ങൾക്ക് അനുസരിച്ചാണ് രാജ്യത്ത് സ്വർണവില നിശ്ചയിക്കപ്പെടുന്നത്. ആഗോളതലത്തിൽ സ്വർണ്ണവിലയിൽ സംഭവിക്കുന്ന ചെറിയ മാറ്റങ്ങൾ പോലും അടിസ്ഥാനപരമായി ഇന്ത്യയിലെ വിലയിൽ പ്രതിഫലിക്കും.
ആഗോള വിപണിയിൽ സ്വർണ്ണത്തിന്റെ ഡിമാൻഡ്, വിതരണം, മറ്റ് സാമ്പത്തിക അസ്ഥിരതകൾ എന്നിവ വിലയെ നേരിട്ട് ബാധിക്കുന്നു. സ്വർണ്ണം പ്രധാനമായും ഡോളറിലാണ് വ്യാപാരം ചെയ്യപ്പെടുന്നത്. രൂപയുടെ മൂല്യം ഇടിയുമ്പോൾ ഇറക്കുമതി ചെയ്യുന്ന സ്വർണ്ണത്തിന് കൂടുതൽ രൂപ നൽകേണ്ടി വരും, ഇത് ആഭ്യന്തര വില വർദ്ധിപ്പിക്കും. ഓരോ വർഷവും ടൺ കണക്കിന് സ്വർണ്ണം ഇറക്കുമതി ചെയ്യുന്ന രാജ്യമാണ് ഇന്ത്യ. സർക്കാർ നിശ്ചയിക്കുന്ന ഇറക്കുമതി തീരുവയുടെ മാറ്റങ്ങൾ ആഭ്യന്തര വിലയെ നേരിട്ട് ബാധിക്കുന്ന പ്രധാന ഘടകമാണ്.
ലോകത്തിലെ ഏറ്റവും വലിയ സ്വർണ്ണ ഉപഭോക്താക്കളാണ് നിലവിൽ ഇന്ത്യ. അതുകൊണ്ട് തന്നെ ആഗോളതലത്തിൽ സ്വർണ്ണവുമായി ബന്ധപ്പെട്ട് ഉണ്ടാകുന്ന എല്ലാ സാമ്പത്തിക രാഷ്ട്രീയ മാറ്റങ്ങളും ഇന്ത്യൻ വിപണിയിൽ വലിയ സ്വാധീനം ചെലുത്തുന്നു.