കോഴിക്കോട്: ദേശീയപാതയ്ക്കരികിൽ എലോക്കരയിൽ പ്രവർത്തിക്കുന്ന 'എം.ആർ.എം എക്കോ സൊല്യൂഷൻസ് പ്രൈവറ്റ് ലിമിറ്റഡ്' എന്ന സ്ഥാപനത്തിൽ ഇന്നലെ പുലർച്ചെ മൂന്നരയോടെ വൻ തീപിടിത്തമുണ്ടായി. മൂന്ന് നിലകളുള്ള കെട്ടിടവും ഫാക്ടറിയിലെ പിക്കപ്പ് വാനും അഗ്നിക്കിരയായി.(Fire at plastic waste plant in Thamarassery, Firecrackers suspected to be the cause)
പുതുവത്സരാഘോഷത്തിന്റെ ഭാഗമായി റോഡിൽ ആരോ പൊട്ടിച്ച പടക്കം പ്ലാന്റിലേക്ക് തെറിച്ചു വീണതാണ് തീപിടിത്തത്തിന് കാരണമായതെന്ന് സംശയിക്കുന്നു. പ്ലാന്റിന് മുന്നിൽ വെച്ച് ആരോ പടക്കം പൊട്ടിച്ചിരുന്നതായി സമീപത്ത് താമസിക്കുന്ന ഇതര സംസ്ഥാന തൊഴിലാളികൾ മൊഴി നൽകിയിട്ടുണ്ട്.
അധികൃതർ വിശദമായ പരിശോധനകൾ ആരംഭിച്ചിട്ടുണ്ട്. അപകടസമയത്ത് ഫാക്ടറിയിൽ തൊഴിലാളികൾ ഇല്ലാതിരുന്നതിനാൽ വൻ ദുരന്തം ഒഴിവാകുകയായിരുന്നു. കോഴിക്കോട്, വെള്ളിമാട്കുന്ന്, മുക്കം, നരിക്കുനി എന്നിവിടങ്ങളിൽ നിന്നുള്ള അഗ്നിരക്ഷാസേനാ യൂണിറ്റുകൾ മണിക്കൂറുകൾ പ്രയത്നിച്ചാണ് തീ പൂർണ്ണമായും അണച്ചത്.