കാഞ്ഞങ്ങാട്: വിവാഹമോചനത്തിന് പിന്നാലെ യുവതി മുൻ ഭർത്താവിന് 16 ലക്ഷം രൂപ വിലമതിക്കുന്ന സ്വർണ്ണം തിരികെ നൽകണമെന്ന് ജില്ലാ കുടുംബകോടതിയുടെ നിർണ്ണായക വിധി (Family Court divorce gold return verdict). നീലേശ്വരം കോട്ടപ്പുറം സ്വദേശിയും പ്രവാസിയുമായ പി.സി. ഷിഹാബുദീൻ സമർപ്പിച്ച ഹർജിയിലാണ് കുടുംബകോടതി ജഡ്ജി സി. ദീപു ഉത്തരവിട്ടത്.
വിവാഹസമയത്ത് മഹർ ആയി നൽകിയ സ്വർണ്ണാഭരണങ്ങളും വിവാഹശേഷം വിവിധ കാലയളവുകളിലായി ഭാര്യയ്ക്ക് വാങ്ങി നൽകിയ സ്വർണ്ണവും തിരികെ ലഭിക്കണമെന്നായിരുന്നു ഷിഹാബുദീന്റെ ആവശ്യം. നേരത്തെ ഇതേ കുടുംബകോടതിയിൽ നിന്ന് ഷിഹാബുദീന്റെ ഭാര്യ വിവാഹമോചനം നേടിയിരുന്നു. ഇതിന് പിന്നാലെയാണ് സ്വർണ്ണം ആവശ്യപ്പെട്ട് ഭർത്താവ് കോടതിയെ സമീപിച്ചത്.
ഹർജിക്കാരൻ സമർപ്പിച്ച തെളിവുകളും വാദങ്ങളും പരിഗണിച്ച കോടതി, ആവശ്യപ്പെട്ട സ്വർണ്ണം തിരികെ നൽകാൻ ഉത്തരവിടുകയായിരുന്നു. ഹർജിക്കാരന് വേണ്ടി നീലേശ്വരത്തെ അഭിഭാഷകൻ എം. അബ്ദുൾ കരീം കോടതിയിൽ ഹാജരായി. വിവാഹമോചനത്തിന് ശേഷമുള്ള സ്വത്ത് തർക്കങ്ങളിൽ ഇത്തരം വിധികൾ അപൂർവ്വമായാണ് ഉണ്ടാകാറുള്ളത്.
Summary: The District Family Court in Kanhangad has ordered a divorced woman to return gold worth Rs 16 lakh to her former husband. The petitioner, P.C. Shihabudeen, an expatriate from Nileshwaram, sought the return of the gold given as ‘Mahr’ during the wedding and additional ornaments gifted later. The court ruled in favor of the husband following a legal battle led by advocate M. Abdul Kareem.
