തിരുവനന്തപുരം: എക്സൈസ് വകുപ്പ് പാലക്കാട് ജില്ലയിലെ കള്ള് പരിശോധനയുമായി ബന്ധപ്പെട്ട് പുറത്തിറക്കിയ വിവാദ ഉത്തരവ് ഭേദഗതി ചെയ്തു. മറ്റ് ജില്ലകളിൽ നിന്നുള്ള ഉദ്യോഗസ്ഥരെ ഒരു മാസത്തേക്ക് പാലക്കാട്ട് ജോലിക്ക് നിയോഗിച്ച ഉത്തരവിലെ, "ജോലിയിൽ വീഴ്ച വരുത്തിയാൽ കടുത്ത നടപടിയുണ്ടാകും" എന്ന നിർദേശമാണ് നിലവിൽ ഒഴിവാക്കിയത്.(Excise Department's controversial order regarding toddy testing amended)
വിവാദം സൃഷ്ടിച്ച ഉത്തരവ് ഇന്നലെ പുറത്തുവന്നതോടെ ഉദ്യോഗസ്ഥർക്കിടയിൽ കടുത്ത അമർഷം ഉടലെടുത്തിരുന്നു. കാസർഗോഡ് മുതൽ തിരുവനന്തപുരം വരെയുള്ള ഉദ്യോഗസ്ഥരെയാണ് പ്രത്യേക ഡ്യൂട്ടിക്കായി പാലക്കാട് നിയമിച്ചത്. എന്നാൽ, മതിയായ വാഹനങ്ങളോ താമസ സൗകര്യങ്ങളോ ഒരുക്കാതെയാണ് ഉദ്യോഗസ്ഥരെ നിയോഗിച്ചതെന്നായിരുന്നു പ്രധാന പരാതി.
ഡ്യൂട്ടിയിൽ വീഴ്ചവരുത്തിയാൽ കർശന നടപടിയുണ്ടാകുമെന്ന എക്സൈസ് അഡി. കമ്മീഷണറുടെ ഉത്തരവിലെ നിർദേശം ഉദ്യോഗസ്ഥരെ സമ്മർദ്ദത്തിലാക്കിയിരുന്നു. ഉദ്യോഗസ്ഥരുടെ പ്രതിഷേധം ശക്തമായതോടെയാണ് അധികൃതർ കടുത്ത നടപടിയുണ്ടാകുമെന്ന നിർദേശം മാത്രം ഉത്തരവിൽ നിന്ന് നീക്കം ചെയ്തുകൊണ്ട് ഭേദഗതി വരുത്തിയത്.