തിരുവനന്തപുരം : കേരളത്തിലെ റോഡുകളുടെ നിലവിലെ അവസ്ഥ ആരെയും അത്ഭുതപ്പെടുത്തുന്നതാണെന്ന് മുഖ്യമന്ത്രി പിണറായി വിജയൻ. വിദേശരാജ്യങ്ങളിൽ ജീവിക്കുന്ന മലയാളികൾ പോലും നാട്ടിലെത്തിയാൽ കേരളത്തിലെ റോഡുകളുടെ മാറ്റം കണ്ട് വിസ്മയം കൊള്ളുകയാണെന്നും അദ്ദേഹം പറഞ്ഞു.(Even a child from New York was shocked to see the roads in Kerala, CM's remark sparks debate)
ഖത്തറിൽ ‘മലയാളോത്സവം 2025’ ഉദ്ഘാടനം ചെയ്യാനെത്തിയപ്പോൾ, കേരളത്തിലെ റോഡുകളുടെ ശോചനീയാവസ്ഥയെക്കുറിച്ച് ഉയർന്ന ചോദ്യത്തിന് മറുപടി പറയുകയായിരുന്നു മുഖ്യമന്ത്രി.
കേരളത്തിലെ റോഡുകളുടെ നിലവാരം എത്രത്തോളം മെച്ചപ്പെട്ടു എന്നതിന് ഉദാഹരണമായി ഒരു സംഭവം മുഖ്യമന്ത്രി വിവരിച്ചു. "ന്യൂയോർക്കിൽ നിന്നെത്തിയ ഒരു കുട്ടി പോലും കേരളത്തിലെ റോഡുകൾ കണ്ട് ഞെട്ടി. കേരളത്തിലേതുപോലുള്ള റോഡുകൾ ന്യൂയോർക്കിലും ഇല്ലെന്ന് ആ കുട്ടി വന്ന് എന്നോട് നേരിട്ട് പറഞ്ഞു," അദ്ദേഹം പറഞ്ഞു.
ന്യൂയോർക്കിൽ താമസിക്കുന്ന ഒരു കുടുംബം കോട്ടയം വഴി പാലക്കാട് വരെ യാത്ര ചെയ്തപ്പോഴാണ് റോഡുകളുടെ ഈ മനോഹരമായ മാറ്റം കണ്ടത്. പാലക്കാട്ടേക്കുള്ള യാത്രയിൽ കുതിരാൻ തുരങ്കത്തിലൂടെയുള്ള യാത്ര കുട്ടിയെ ഏറെ ആകർഷിച്ചു.
ന്യൂയോർക്കിൽ പോലും ഇത്തരം റോഡുകളില്ലെന്ന് കുട്ടി അച്ഛനോടും അമ്മയോടും പറഞ്ഞു. ഇക്കാര്യം പറയാൻ വേണ്ടി മാത്രമാണ് കുട്ടിയേയും കൂട്ടി അവർ തന്റെ അടുത്ത് വന്നതെന്നും മുഖ്യമന്ത്രി കൂട്ടിച്ചേർത്തു. റോഡുകളുടെ നിലവാരം ഉയർന്നത് കേരളത്തിന്റെ വികസന നേട്ടമാണെന്ന് മുഖ്യമന്ത്രി അടിവരയിട്ടു.