കൊച്ചി: 12,000 വർഷത്തെ നിദ്രയ്ക്ക് ശേഷം എത്യോപ്യയിലെ ഹെയ്‌ലി ഗബ്ബി അഗ്നിപർവതം പൊട്ടിത്തെറിച്ചത് അന്താരാഷ്ട്ര വ്യോമഗതാഗതത്തെയും ഇന്ത്യയിലെ വായു ഗുണനിലവാരത്തെയും ബാധിക്കുന്നു. അഗ്നിപർവതത്തിൽനിന്നുള്ള ചാരവും പുകയും ഏകദേശം 4,000 കിലോമീറ്ററിലധികം ദൂരത്തുള്ള ഇന്ത്യയിൽ വരെ എത്തിയിരിക്കുകയാണ്.(Ethiopia volcano erupts, sending ash and smoke into India)
ചാരവും പുകയും നിറഞ്ഞ മേഘങ്ങൾ നിലവിൽ ഡൽഹി, ഹരിയാണ, പടിഞ്ഞാറൻ ഉത്തർപ്രദേശ് മേഖലകൾക്ക് മുകളിലൂടെ നീങ്ങുകയാണ്. രാജസ്ഥാനിലും പുകപടലങ്ങൾ എത്തിയതായി റിപ്പോർട്ടുണ്ട്. ഈ ചാരത്തിൻ്റെ സാന്നിധ്യം ഡൽഹിയിലും സമീപപ്രദേശങ്ങളിലുമുള്ള വായുവിൻ്റെ ഗുണനിലവാരം മോശമാക്കാൻ സാധ്യതയുണ്ട്.
യെമെൻ, ഒമാൻ, പാകിസ്താൻ തുടങ്ങിയ രാജ്യങ്ങളുടെ വ്യോമപാതയിൽ ചാരവും പുകയും വ്യാപിച്ചതിനെ തുടർന്ന് നിരവധി അന്താരാഷ്ട്ര വിമാന സർവീസുകൾ റദ്ദാക്കുകയോ വഴിതിരിച്ചുവിടുകയോ ചെയ്തു. കൊച്ചി വിമാനത്താവളത്തിലെ സർവീസുകളെയും ഇത് ബാധിച്ചു.
തിങ്കളാഴ്ച വൈകീട്ട് 6.25-ന് ജിദ്ദയിൽനിന്ന് കൊച്ചിയിലെത്തേണ്ടിയിരുന്ന ആകാശ എയർ വിമാനം റദ്ദാക്കി. 6.30-ന് കൊച്ചിയിലെത്തേണ്ടിയിരുന്ന ഇൻഡിഗോയുടെ ദുബായ് വിമാനവും റദ്ദാക്കി. ഈ രണ്ടു വിമാനങ്ങളുടെയും കൊച്ചിയിൽനിന്നുള്ള മടക്കയാത്രകളും മുടങ്ങി. ഇതോടെ, ജിദ്ദയിലേക്ക് പോകാനെത്തിയ ഉംറ തീർഥാടകർ അടക്കമുള്ള യാത്രക്കാർ ദുരിതത്തിലായി.
കണ്ണൂരിൽനിന്ന് അബുദാബിയിലേക്കുപോയ ഇൻഡിഗോ വിമാനം ഒമാൻ വ്യോമപാതയിൽവെച്ച് അഹമ്മദാബാദിലേക്ക് തിരിച്ചയച്ചു. യാത്രക്കാരെ പിന്നീട് മറ്റൊരു വിമാനത്തിൽ കണ്ണൂരിലെത്തിച്ചു. ഇവർക്ക് മറ്റു വിമാനങ്ങളിൽ യാത്രാസൗകര്യമൊരുക്കുമെന്ന് അധികൃതർ അറിയിച്ചിട്ടുണ്ട്.
അഗ്നിപർവത ചാരം വിമാന എൻജിനുകളുടെ പ്രവർത്തനത്തെ തകരാറിലാക്കാൻ സാധ്യതയുള്ളതിനാലാണ് വ്യോമയാന നിയന്ത്രണങ്ങൾ ഏർപ്പെടുത്തിയത്. ചാരം നിറഞ്ഞ മേഘങ്ങളുള്ളയിടങ്ങളിൽ എത്ര ഉയരത്തിൽ വിമാനം പറത്താം എന്നത് സംബന്ധിച്ച് ഡയറക്ടർ ജനറൽ ഓഫ് സിവിൽ ഏവിയേഷൻ (DGCA) പ്രത്യേക നിർദേശങ്ങൾ പുറത്തിറക്കിയിട്ടുണ്ട്. ആവശ്യമെങ്കിൽ വിമാനങ്ങൾ വഴിതിരിച്ചുവിടാനും യാത്രകൾക്ക് സമയം ക്രമീകരിക്കാനും നിർദേശമുണ്ട്.
ഇൻഡിഗോ, ആകാശ എയർ, എയർ ഇന്ത്യ തുടങ്ങിയ പ്രമുഖ വിമാനക്കമ്പനികളെല്ലാം യാത്രക്കാർക്കായി പ്രത്യേക അറിയിപ്പുകൾ പുറപ്പെടുവിച്ചു. അഗ്നിപർവത ചാരം നിലവിൽ പടിഞ്ഞാറൻ ഇന്ത്യൻ സംസ്ഥാനങ്ങൾക്ക് മുകളിലേക്കാണ് പറന്നെത്തുന്നത്. വിമാന എൻജിനുകൾക്ക് ചാരം ഭീഷണിയാകാൻ സാധ്യതയുള്ള സാഹചര്യത്തിലാണ് ജാഗ്രതാ നിർദേശം. യാത്രക്കാരുടെ സുരക്ഷയ്ക്കാണ് മുൻഗണനയെന്നും സാഹചര്യം സൂക്ഷ്മമായി നിരീക്ഷിക്കുകയാണെന്നും ഇൻഡിഗോ സോഷ്യൽ മീഡിയ പ്ലാറ്റ്‌ഫോമുകളിലൂടെ വ്യക്തമാക്കി. യാത്രക്കാർക്ക് ആവശ്യമായ എല്ലാ സഹായവും നൽകുന്നതിനായി പ്രത്യേക ടീമിനെ സജ്ജമാക്കിയതായും കമ്പനി അറിയിച്ചു.
നിലവിൽ വിമാന സർവീസുകൾക്ക് പ്രശ്‌നങ്ങളൊന്നും ഇല്ലെങ്കിലും സാഹചര്യം അതീവ ഗൗരവത്തോടെ വീക്ഷിക്കുന്നതായി എയർ ഇന്ത്യയും ആകാശ എയറും അറിയിച്ചിട്ടുണ്ട്. അന്താരാഷ്ട്ര സർവീസുകൾ തടസ്സപ്പെടാൻ സാധ്യതയുണ്ടെന്ന് മുംബൈ അന്താരാഷ്ട്ര വിമാനത്താവള അധികൃതർ അറിയിച്ചു.
ഏകദേശം 10,000 വർഷമായി നിഷ്ക്രിയമായിരുന്ന ഹെയ്‌ലി ഗുബ്ബി അഗ്നിപർവതം ഞായറാഴ്ച രാവിലെ 8:30 ഓടെയാണ് പൊട്ടിത്തെറിച്ചത്. നിലവിൽ ഇവിടെ സ്ഫോടനം അവസാനിച്ചതായാണ് റിപ്പോർട്ട്. ഞായറാഴ്ച ചെങ്കടലിന് കുറുകെ ഒമാനിലേക്കും യെമനിലേക്കും വ്യാപിച്ച ചാരമേഘങ്ങൾ അവിടെനിന്ന് കിഴക്കൻ ദിശയിൽ ഇന്ത്യ ലക്ഷ്യമിട്ട് നീങ്ങുകയാണ്. അന്തരീക്ഷത്തിൽ ചാരത്തിൻ്റെ സാന്നിധ്യം ഉണ്ടെങ്കിലും, വിമാന ഗതാഗതത്തെ ബാധിക്കുന്ന തരത്തിലുള്ള സുരക്ഷാ അറിയിപ്പുകൾ ഇതുവരെ പുറപ്പെടുവിച്ചിട്ടില്ല. എന്നാൽ മുൻകരുതലിൻ്റെ ഭാഗമായി വിമാനക്കമ്പനികൾ സ്ഥിതിഗതികൾ കർശനമായി നിരീക്ഷിച്ച് വരികയാണ്.