തിരുവനന്തപുരം : ബി.ജെ.പി. നേതാവ് പ്രകാശ് ജാവദേക്കറുമായുള്ള കൂടിക്കാഴ്ചയുമായി ബന്ധപ്പെട്ട് നിലനിന്നിരുന്ന വിവാദങ്ങളിൽ മുതിർന്ന സി.പി.എം. നേതാവ് ഇ.പി. ജയരാജൻ മനസ്സുതുറന്നു. ദുബായിൽ നടത്തിയ പരിപാടിയിലാണ് അദ്ദേഹം ജാവദേക്കർ കൂടിക്കാഴ്ച, ആത്മകഥാ വിവാദം, രാഷ്ട്രീയ സാഹചര്യം എന്നിവയിൽ നിലപാട് വ്യക്തമാക്കിയത്.(EP Jayarajan opens up and says it's all a Planned controversy)
പ്രകാശ് ജാവദേക്കറിനെ കണ്ടത് വെറും അഞ്ച് മിനിറ്റ് മാത്രമാണെന്ന് ഇ.പി. ജയരാജൻ പറഞ്ഞു. കുറെ മുൻപ് നടന്ന ഈ സംഭവം തിരഞ്ഞെടുപ്പ് സമയത്താണ് വിവാദമായതെന്നും അദ്ദേഹം ചൂണ്ടിക്കാട്ടി. തൻ്റെ ആദ്യ പുസ്തകം പുറത്തിറങ്ങുന്നു എന്ന തരത്തിൽ വന്ന വാർത്തകൾ ബോധപൂർവം ഉണ്ടാക്കിയ ആസൂത്രിത വിവാദമായിരുന്നുവെന്നും ഇ.പി. ആരോപിച്ചു.
"അന്ന് പുസ്തകം പുറത്ത് ഇറങ്ങുന്നു എന്ന വാർത്ത ബോധപൂർവം ഉണ്ടാക്കിയതാണ്. ഇതിനെതിരെ നിയമ നടപടി സ്വീകരിച്ചു. അവർക്ക് ഒന്നും പറയാനില്ലായിരുന്നു, അവർ ഖേദം പ്രകടിപ്പിച്ചു. ഞങ്ങൾ വിശാല മനസ്സുള്ളവരാണ്, അവരോട് തുടർ നടപടി സ്വീകരിച്ചില്ല."
ഇന്ത്യൻ രാഷ്ട്രീയ സാഹചര്യം സങ്കീർണമാണെന്ന് ഇ.പി. ജയരാജൻ വിലയിരുത്തി. ജനാധിപത്യ മതേതര വിശാല ഐക്യം രാജ്യത്ത് വളരണമെന്നും അദ്ദേഹം ആവശ്യപ്പെട്ടു. വരാനിരിക്കുന്ന തദ്ദേശ തിരഞ്ഞെടുപ്പിൽ ഇടതുമുന്നണി വലിയ പ്രതീക്ഷയിലാണ്. നിലവിലുള്ളതിനേക്കാൾ കൂടുതൽ ഭൂരിപക്ഷം നേടുമെന്ന് അദ്ദേഹം ആത്മവിശ്വാസം പ്രകടിപ്പിച്ചു.
പി.എം. ശ്രീ പദ്ധതിയിൽ ബി.ജെ.പി.യുടെ അജണ്ട കേരളത്തിൽ നടപ്പാക്കില്ല. ഈ വിഷയത്തിൽ ഉയർന്ന മറ്റു ചർച്ചകൾ ഒഴിവാക്കേണ്ടിയിരുന്നു. സംസ്ഥാന സർക്കാരിൻ്റെ സമീപനം മാധ്യമങ്ങൾ ഇനിയും ശരിയായ വശം മനസ്സിലാക്കിയിട്ടില്ലെന്നും അദ്ദേഹം കുറ്റപ്പെടുത്തി. കേരളത്തിലെ ആരോഗ്യ മേഖലയിൽ സിസ്റ്റം തകരാറില്ല. ഏതെങ്കിലും ഒരു ആശുപത്രിയിലെ കാര്യം വെച്ച് അങ്ങനെ പറയാൻ കഴിയില്ലെന്നും ഇ.പി. പറഞ്ഞു.
ഭരണത്തുടർച്ച: കേരളത്തിൽ ഇനിയും ഭരണത്തുടർച്ച ഉണ്ടാകും. സർക്കാർ ചെയ്യുന്ന കാര്യങ്ങളോട് ജനങ്ങൾ പ്രതികരിക്കുമെന്നും ജനം അത് ആഗ്രഹിക്കുന്നുണ്ടെന്നും ഇ.പി. ജയരാജൻ കൂട്ടിച്ചേർത്തു.