തിരുവനന്തപുരം: സംസ്ഥാനത്ത് കനത്ത മഴ തുടരുന്ന സാഹചര്യത്തിൽ തിരുവനന്തപുരത്തെ പ്രധാന വിനോദസഞ്ചാര കേന്ദ്രമായ പൊന്മുടി ഇക്കോ ടൂറിസം കേന്ദ്രം താൽക്കാലികമായി അടച്ചു. ഇന്ന് (24.10.2025) മുതൽ ഇനി ഒരു അറിയിപ്പ് ഉണ്ടാകുന്നത് വരെ പൊന്മുടിയിലേക്കുള്ള പ്രവേശനം നിർത്തിവെച്ചതായി തിരുവനന്തപുരം ഡിവിഷണൽ ഫോറസ്റ്റ് ഓഫീസർ അറിയിച്ചു. സഞ്ചാരികളുടെ സുരക്ഷയും അപകട സാധ്യതകളും കണക്കിലെടുത്താണ് വനം വകുപ്പിന്റെ ഈ തീരുമാനം.(Entry to Ponmudi has closed due to Heavy rains)
തലസ്ഥാന നഗരത്തിലും മലയോര മേഖലയിലുമെല്ലാം കഴിഞ്ഞ ദിവസങ്ങളിൽ ശക്തമായ മഴയാണ് ലഭിച്ചത്. ഇന്ന് പുലർച്ചെ മുതൽ തിരുവനന്തപുരത്ത് ശക്തമായ മഴ തുടരുകയുമാണ്. മഴ ശക്തമാകുമ്പോൾ പോകുന്ന വഴിയിൽ മണ്ണിടിയാനും ഗതാഗതക്കുരുക്ക് ഉണ്ടാകാനുമുള്ള സാധ്യതകളുണ്ട്. ഈ സാഹചര്യമാണ് പ്രവേശനം താത്ക്കാലികമായി നിർത്തിവെക്കാൻ അധികൃതരെ പ്രേരിപ്പിച്ചത്. സാധാരണയായി രാവിലെ 8 മണി മുതൽ വൈകുന്നേരം 4 മണി വരെയാണ് പൊന്മുടിയിലേക്ക് പ്രവേശനം അനുവദിക്കാറുള്ളത്.
സംസ്ഥാനത്ത് മഴ മുന്നറിയിപ്പ് തുടരുന്നു
സംസ്ഥാനത്ത് ഇന്നും കനത്ത മഴയ്ക്ക് സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു.
ഓറഞ്ച് അലർട്ട് (5 ജില്ലകൾ): മലപ്പുറം, കോഴിക്കോട്, വയനാട്, കണ്ണൂർ, കാസർകോട്.
യെല്ലോ അലർട്ട് (5 ജില്ലകൾ): തിരുവനന്തപുരം, എറണാകുളം, ഇടുക്കി, തൃശ്ശൂർ, പാലക്കാട്.
മത്സ്യബന്ധന വിലക്ക്: കേരള തീരത്ത് മത്സ്യബന്ധനത്തിന് വിലക്ക് തുടരുന്നു.
ന്യൂനമർദ്ദ സാഹചര്യം: തെക്ക് കിഴക്കൻ അറബിക്കടലിൽ തീവ്ര ന്യൂനമർദ്ദവും തെക്കൻ കർണാടകയ്ക്ക് മുകളിൽ ന്യൂനമർദ്ദവും സ്ഥിതി ചെയ്യുന്നുണ്ട്. തെക്ക് കിഴക്കൻ ബംഗാൾ ഉൾക്കടലിൽ മറ്റൊരു ന്യൂനമർദ്ദവും രൂപപ്പെട്ടേക്കുമെന്നാണ് മുന്നറിയിപ്പ്.