തിരുവനന്തപുരം: നഗരസഭയുടെ ആവശ്യങ്ങൾക്കായി കേന്ദ്രം അനുവദിച്ച ഇ-ബസുകൾ നഗരത്തിന് പുറത്ത് സർവീസ് നടത്തുന്നതിനെതിരെ ശക്തമായ നിലപാടുമായി തിരുവനന്തപുരം മേയർ വി.വി. രാജേഷ്. നഗരത്തിന് പുറത്തേക്ക് മാറ്റിയ ഇ-ബസുകൾ ഉടൻ തിരിച്ചെത്തിക്കണമെന്നും ഇവ തിരുവനന്തപുരം നഗരത്തിൽ മാത്രമാണ് ഓടേണ്ടതെന്നും അദ്ദേഹം ആവശ്യപ്പെട്ടു. പ്രമുഖ മാധ്യമത്തോടാണ് അദ്ദേഹം ഇക്കാര്യം വ്യക്തമാക്കിയത്.(E-buses should only run in the city, Thiruvananthapuram Mayor VV Rajesh toughens stance against KSRTC)
രാഷ്ട്രീയ സമ്മർദ്ദങ്ങൾക്ക് വഴങ്ങിയാണ് ഇ-ബസുകൾ മറ്റ് സ്ഥലങ്ങളിലേക്ക് മാറ്റിയതെന്ന് മേയർ കുറ്റപ്പെടുത്തി. "കേന്ദ്ര സർക്കാർ ഈ ബസുകൾ തിരുവനന്തപുരം കോർപ്പറേഷന് വേണ്ടിയാണ് നൽകിയത്. അതിനാൽ നഗരവാസികൾക്ക് ഇതിന്റെ ഗുണം ലഭിക്കണം. കരാർ മാറ്റാൻ ഒന്നോ രണ്ടോ വ്യക്തികൾക്ക് അധികാരമില്ല," അദ്ദേഹം പറഞ്ഞു.
നഗരപരിധിക്ക് പുറത്തേക്ക് മാറ്റിയ എല്ലാ ഇ-ബസുകളും അടിയന്തരമായി സിറ്റി സർവീസിലേക്ക് തിരികെ കൊണ്ടുവരണം. ഇ-ബസ് സർവീസിൽ നിന്നുള്ള ലാഭവിഹിതം കോർപ്പറേഷന് കൃത്യമായി ലഭിക്കണം. ഇ-ബസുകൾ സംബന്ധിച്ച് കെ.എസ്.ആർ.ടി.സിയുമായി നിലവിലുള്ള കരാർ രേഖകൾ നഗരസഭ വിശദമായി പരിശോധിക്കും.