കൊച്ചി: 414 ദിവസമായി തുടരുന്ന മുനമ്പം ഭൂസംരക്ഷണ സമിതിയുടെ സമരം അവസാനിപ്പിക്കുന്നതിനിടെ സമരവേദിയിൽ നാടകീയ രംഗങ്ങൾ. ഭൂരിപക്ഷം സമരസമിതി അംഗങ്ങൾ സർക്കാർ ഉറപ്പുകളിൽ വിശ്വാസമർപ്പിച്ച് സമരം അവസാനിപ്പിക്കാൻ തീരുമാനിച്ചപ്പോൾ, സമരം അവസാനിപ്പിക്കുന്നത് വഞ്ചനയാണെന്ന് ആരോപിച്ച് ബി.ജെ.പി. അനുകൂലികളായ നാട്ടുകാർ പുതിയ സമരപ്പന്തലിലേക്ക് മാറി.(Dramatic scenes at the Munambam protest venue, BJP supporters move to new protest venue)
വഖഫ് രജിസ്ട്രിയിൽ നിന്ന് മുനമ്പത്തെ ഭൂമി പൂർണ്ണമായും ഒഴിവാക്കുകയും നിയമനടപടിയിലൂടെ തീർപ്പുണ്ടാക്കുകയും ചെയ്യാതെ സമരം അവസാനിപ്പിക്കുന്നതാണ് വിമതരുടെ പ്രതിഷേധത്തിന് കാരണം. ഭൂമി പ്രശ്നത്തിന് ശാശ്വത പരിഹാരം ഉണ്ടാകും വരെ സമരം തുടരുമെന്ന് ഇവർ പ്രഖ്യാപിച്ചു. പള്ളിക്ക് പുറത്ത് ഒരുക്കിയ പുതിയ സമരപ്പന്തലിൽ ഇവർ നിലവിൽ സമരം തുടങ്ങിയിട്ടുണ്ട്.
സമരസമിതി നേതൃത്വം സംസ്ഥാന സർക്കാരിനോട് അടുക്കുന്നുവെന്ന് വ്യക്തമായതോടെയാണ് സമരസമിതിയിലെ ബി.ജെ.പി. അനുകൂലികൾ അതൃപ്തി പരസ്യമാക്കിയത്. വഖഫ് ബോർഡിന്റെ ലാൻഡ് രജിസ്ട്രിയിൽ നിന്ന് 615 കുടുംബങ്ങളുടെ ഭൂമി പൂർണ്ണമായും ഒഴിവാക്കുന്നത് വരെ സമരവുമായി മുന്നോട്ടുപോകുമെന്നാണ് ഇവർ വ്യക്തമാക്കുന്നത്. റവന്യൂ മന്ത്രി കെ. രാജൻ, പി. രാജീവ് എന്നിവർ സമാപനയോഗത്തിൽ പങ്കെടുക്കാനിരിക്കെയാണ് ഭൂരിപക്ഷം വരുന്ന ഭൂസംരക്ഷണ സമിതി സമരം അവസാനിപ്പിക്കാൻ തീരുമാനിച്ചത്.
കഴിഞ്ഞ ദിവസത്തെ ഹൈക്കോടതി ഉത്തരവോടെ കുടുംബങ്ങൾക്ക് വ്യവസ്ഥകളോടെ കരമടയ്ക്കാൻ അനുമതി ലഭിച്ചിരുന്നു. ഇതോടെ ഭൂമി പോക്കുവരവിനും വഴിയൊരുങ്ങി. മുനമ്പം ജനതയെ കുടിയിറക്കില്ലെന്ന മുഖ്യമന്ത്രിയുടെ ഉറപ്പ് പാലിക്കപ്പെട്ടെന്ന് കഴിഞ്ഞ ദിവസം മന്ത്രി പി. രാജീവ് അവകാശപ്പെട്ടിരുന്നു. ഇനി ജുഡീഷ്യൽ കമ്മീഷന്റെ പ്രശ്നപരിഹാരത്തിനും വഖഫ് ട്രൈബ്യൂണലിലെ തീർപ്പിനുമായാണ് മുനമ്പം നിവാസികൾ കാത്തിരിക്കുന്നത്.
സമരസമിതി കൺവീനർ ജോസഫ് ബെന്നിയെ തദ്ദേശ തിരഞ്ഞെടുപ്പിൽ യു.ഡി.എഫ്. സ്ഥാനാർഥിയായി മത്സരിപ്പിക്കാനുള്ള ചർച്ചകൾ കോൺഗ്രസ് നേതാക്കൾ നടത്തിയിരുന്നു. ഈ വിഷയമടക്കം ഉന്നയിച്ച് സമരസമിതിയുടെ ഭാഗമായി പ്രവർത്തിച്ച ബി.ജെ.പി. അനുകൂലികളിൽ ചിലർ ഭിന്നാഭിപ്രായം രേഖപ്പെടുത്തിയിരുന്നു.