ബെംഗളൂരു: ബെംഗളൂരുവിലെ ഫക്കീർ കോളനിയിലും വാസിം ലേഔട്ടിലും നടന്ന കുടിയൊഴിപ്പിക്കൽ നടപടിയെ വിമർശിച്ച കേരള മുഖ്യമന്ത്രി പിണറായി വിജയന് കടുത്ത ഭാഷയിൽ മറുപടി നൽകി കർണാടക ഉപമുഖ്യമന്ത്രി ഡി.കെ. ശിവകുമാർ. കർണാടകയുടെ ആഭ്യന്തര കാര്യങ്ങളിൽ വസ്തുതകൾ അറിയാതെ ഇടപെടരുതെന്നും പിണറായിയുടെ പരാമർശങ്ങൾ രാഷ്ട്രീയ താൽപ്പര്യത്തോടെയുള്ളതാണെന്നും ശിവകുമാർ കുറ്റപ്പെടുത്തി.
ബെംഗളൂരുവിലെ പൊളിച്ചുനീക്കൽ അങ്ങേയറ്റം ഞെട്ടിക്കുന്നതും വേദനാജനകവുമാണെന്ന് വെള്ളിയാഴ്ച ഫേസ്ബുക്ക് പോസ്റ്റിലൂടെ പിണറായി വിജയൻ വിമർശിച്ചിരുന്നു. സാധാരണക്കാരായ ജനങ്ങളെ തെരുവിലേക്കിറക്കിവിടുന്ന നടപടി ജനാധിപത്യ സർക്കാരുകൾക്ക് ചേർന്നതല്ലെന്നും അദ്ദേഹം ചൂണ്ടിക്കാട്ടിയിരുന്നു. ഇതിന് പിന്നാലെയാണ് ശിവകുമാർ പ്രതികരണവുമായി രംഗത്തെത്തിയത്.
ഖരമാലിന്യം നിക്ഷേപിക്കാൻ നീക്കിവച്ച അപകടകരമായ ഒരു ക്വാറി കുഴിയായിരുന്നു ഈ സ്ഥലം. അത് അനധികൃതമായി കയ്യേറി താമസം തുടങ്ങിയതാണെന്ന് ശിവകുമാർ പറഞ്ഞു. ദുരിതബാധിതരെ മാനുഷിക പരിഗണനയോടെ മാറ്റിപ്പാർപ്പിച്ചിട്ടുണ്ട്. അർഹരായവർക്ക് രാജീവ് ഗാന്ധി ആവാസ് യോജന പ്രകാരം ബദൽ ഭവനസൗകര്യം നൽകാൻ സർക്കാർ തയ്യാറാണെന്നും അദ്ദേഹം വ്യക്തമാക്കി.
പിണറായി വിജയനെപ്പോലൊരു മുതിർന്ന നേതാവ് കാര്യങ്ങൾ മനസ്സിലാക്കാതെ സംസാരിക്കുന്നത് നിർഭാഗ്യകരമാണ്. തിരഞ്ഞെടുപ്പ് ലക്ഷ്യമിട്ടുള്ള രാഷ്ട്രീയ ഗിമ്മിക്കുകളാണ് ഇതെന്നും ശിവകുമാർ പരിഹസിച്ചു.
സംസ്ഥാനത്തെ ഭൂമി സംരക്ഷിക്കാനാണ് സർക്കാർ ശ്രമിച്ചതെന്നും അർഹരായവർക്ക് വീട് നൽകാൻ ഉദ്യോഗസ്ഥരോട് റിപ്പോർട്ട് തേടിയിട്ടുണ്ടെന്നും അദ്ദേഹം കൂട്ടിച്ചേർത്തു. കേരളത്തിലെ കോൺഗ്രസ് നേതാക്കൾ വിഷയത്തിൽ താനുമായി സംസാരിച്ചിട്ടുണ്ടെന്നും ശിവകുമാർ ബെംഗളൂരുവിൽ മാധ്യമങ്ങളോട് പറഞ്ഞു.