കൊല്ലം: സംസ്ഥാനത്ത് വീണ്ടും ട്രെയിൻ യാത്രക്കിടെ ആക്രമണം. കൊല്ലം ശാസ്താംകോട്ടയിൽ വെച്ച് ഓടിക്കൊണ്ടിരുന്ന ട്രെയിനിൽ ഭിന്നശേഷിക്കാരനായ യുവാവിന് നേരെയാണ് അതിക്രമം ഉണ്ടായത്.(Differently abled man beaten up in Train, Another assault during train journey)
ബെംഗളൂരുവിൽ നിന്ന് കന്യാകുമാരിക്ക് പോവുകയായിരുന്ന ഐലൻഡ് എക്സ്പ്രസിലെ ഭിന്നശേഷിക്കാരുടെ കംപാർട്ട്മെൻ്റിൽ വെച്ചാണ് ആക്രമണം നടന്നത്. ആലപ്പുഴ താമരക്കുളം സ്വദേശിയായ നാസറിനാണ് മർദ്ദനമേറ്റത്.
നാസറിൻ്റെ മുഖത്താണ് പരിക്കേറ്റത്. നാസറിനെ ആക്രമിച്ചശേഷം അക്രമി ട്രെയിനിൽ നിന്ന് ചാടി രക്ഷപ്പെട്ടു. ഈ നടുക്കുന്ന സംഭവം നടന്നത്, വർക്കലയിൽ കേരള എക്‌സ്പ്രസ് ട്രെയിനിൽ 19 വയസ്സുകാരിയെ മദ്യലഹരിയിൽ യാത്രക്കാരൻ ചവിട്ടി പുറത്തേക്ക് തള്ളിയിട്ട സംഭവത്തിന് തൊട്ടുപിന്നാലെയാണ്.
റെയിൽവേ പോലീസ് നാസറിൻ്റെ മൊഴിയെടുത്തിട്ടുണ്ട്. ട്രെയിനുകളിൽ യാത്രക്കാരുടെ സുരക്ഷ ഉറപ്പാക്കുന്നതിൽ വീഴ്ചയുണ്ടോ എന്ന ആശങ്ക ഈ സംഭവം വീണ്ടും ഉയർത്തുന്നു.