തിരുവനന്തപുരം: തദ്ദേശ സ്വയംഭരണ തെരഞ്ഞെടുപ്പിലെ തിരിച്ചടിയെ ചൊല്ലി സി.പി.എമ്മും സി.പി.ഐയും രണ്ട് തട്ടിലായ സാഹചര്യത്തിൽ ഇടതുമുന്നണി യോഗം ഇന്ന് തിരുവനന്തപുരത്ത് ചേരും. തെരഞ്ഞെടുപ്പ് തോൽവിക്ക് പിന്നിൽ ഭരണവിരുദ്ധ വികാരവും ശബരിമല സ്വർണ്ണക്കൊള്ളയുമാണെന്ന നിലപാടിലാണ് സി.പി.ഐ. എന്നാൽ, സി.പി.എം. ഈ വിലയിരുത്തലുകൾ തള്ളിക്കളയുകയും ഭരണവിരുദ്ധ വികാരമോ ശബരിമല വിഷയമോ തെരഞ്ഞെടുപ്പിനെ ബാധിച്ചിട്ടില്ലെന്ന് വാദിക്കുകയും ചെയ്യുന്നു.(Defeat in local body elections, LDF meeting today amid differences of opinion)
സി.പി.ഐ സംസ്ഥാന നിർവാഹക സമിതി യോഗത്തിൽ മുഖ്യമന്ത്രിയുടെ പ്രവർത്തന ശൈലിക്കെതിരെ രൂക്ഷമായ വിമർശനങ്ങൾ ഉയർന്നു. മുന്നണിയെ വിശ്വാസത്തിലെടുക്കാതെ മുഖ്യമന്ത്രി ഒറ്റയാൾ പട്ടാളം പോലെ പെരുമാറുന്നു എന്നും, മുന്നണിയിൽ കൂട്ടായ ചർച്ചകൾ നടക്കുന്നില്ലെന്നും സി.പി.ഐ. കുറ്റപ്പെടുത്തി. സർക്കാർ വിരുദ്ധ വോട്ടുകൾ തെരഞ്ഞെടുപ്പിൽ പതിച്ചുവെന്നാണ് സി.പി.ഐ. നേതൃയോഗത്തിന്റെ പൊതുവിലയിരുത്തൽ. കൂടാതെ, ന്യൂനപക്ഷ വോട്ടുകൾ ചോർന്നിട്ടില്ലെന്ന സി.പി.എം. നിലപാടും സി.പി.ഐ. നിർവാഹക സമിതി തള്ളി.
തോൽവിക്ക് പിന്നിൽ ഭരണവിരുദ്ധ വികാരം ഇല്ലെന്ന ശക്തമായ നിലപാടിലാണ് സി.പി.എം. സെക്രട്ടേറിയേറ്റ്. ഭരണം മികച്ചതാണെന്നും പിണറായി സർക്കാരിന്റെ പ്രവർത്തനങ്ങളിൽ ജനങ്ങൾ സംതൃപ്തരാണെന്നും സി.പി.എം. വിലയിരുത്തുന്നു. ശബരിമല സ്വർണക്കൊള്ള തെരഞ്ഞെടുപ്പിൽ തിരിച്ചടിയായിട്ടില്ലെന്നും സി.പി.എം. സംസ്ഥാന സെക്രട്ടറി എം.വി. ഗോവിന്ദൻ വ്യക്തമാക്കി. കുറ്റം തെളിയാതെ ജയിലിൽ കഴിയുന്ന സി.പി.എം. നേതാക്കൾക്കെതിരെ നടപടി എടുക്കാനാകില്ലെന്നും അദ്ദേഹം കൂട്ടിച്ചേർത്തു.
തോൽവിയുടെ വ്യാപ്തി സി.പി.എം. സമ്മതിക്കുന്നുണ്ട്. പാർട്ടിയുടെ ശക്തികേന്ദ്രങ്ങളിൽ പോലും തിരിച്ചടി നേരിട്ടത് സി.പി.എം. പ്രത്യേകം പഠനവിഷയമാക്കും. കൊല്ലത്ത് ഞെട്ടലുണ്ടായതും മധ്യകേരളത്തിൽ വോട്ട് ചോർന്നതും വിശദമായി പരിശോധിക്കും. തിരുവനന്തപുരം നഗരസഭ ബി.ജെ.പി. പിടിച്ചെടുത്തതിന് പിന്നിൽ യു.ഡി.എഫ്. - ബി.ജെ.പി. അഡ്ജസ്റ്റ്മെന്റാണെന്ന ആരോപണവും സി.പി.എം. ഉന്നയിക്കുന്നുണ്ട്.
രാവിലെ പത്തരയ്ക്ക് ചേരുന്ന എൽ.ഡി.എഫ്. യോഗത്തിൽ ഈ വിഷയങ്ങളെല്ലാം വിശദമായി ചർച്ച ചെയ്യും. ഇരു പാർട്ടികളും പരസ്യമായി ഭിന്ന അഭിപ്രായങ്ങൾ പ്രകടിപ്പിച്ച സാഹചര്യത്തിൽ, യോഗത്തിലെ ചർച്ചകളും തീരുമാനങ്ങളും നിർണ്ണായകമാകും.