തിരുവനന്തപുരം: കേരളത്തോട് ചേർന്നുള്ള ആഴക്കടലിൽ വൻ എണ്ണ-പ്രകൃതിവാതക സമ്പത്തുണ്ടെന്ന് കരുതുന്ന മേഖലയിൽ, കേന്ദ്ര പൊതുമേഖലാ സ്ഥാപനമായ ഓയിൽ ഇന്ത്യ ഡ്രില്ലിങ്ങിന് തുടക്കമിട്ടു. കേരളത്തിന്റെ തെക്കേ അറ്റം മുതൽ മഹാരാഷ്ട്ര വരെ നീളുന്ന കേരള-കൊങ്കൺ ബേസിനിൽ, കൊല്ലത്തോട് ചേർന്നുള്ള പ്രദേശത്താണ് നിലവിൽ പര്യവേക്ഷണം നടക്കുന്നത്.(Deep sea oil and gas exploration begins off Kerala coast)
ഈ വിവരങ്ങൾ കേന്ദ്ര പെട്രോളിയം മന്ത്രി ഹർദീപ് സിങ് പുരി 'എക്സി'ലൂടെ സ്ഥിരീകരിച്ചു. ഊർജ സ്വയംപര്യാപ്തതയിലേക്കുള്ള ഇന്ത്യയുടെ ശ്രമങ്ങൾക്ക് ഇതൊരു വൻ കുതിച്ചുചാട്ടമാണെന്ന് മന്ത്രി എടുത്തുപറഞ്ഞു. നിലവിൽ, ഇന്ത്യയുടെ ക്രൂഡ് ഓയിൽ ഉപഭോഗത്തിന്റെ 85-90% ഇറക്കുമതിയെ ആശ്രയിച്ചാണ്. പ്രകൃതിവാതക ഉപഭോഗത്തിന്റെ 50 ശതമാനവും ഇറക്കുമതിയാണ്.
ആഭ്യന്തര ഉൽപാദനം വർദ്ധിപ്പിച്ച് ഇറക്കുമതി ആശ്രിതത്വം പരമാവധി കുറയ്ക്കുന്നതിനുള്ള രാജ്യത്തിന്റെ ശ്രമങ്ങളുടെ ഭാഗമായാണ് കേരള-കൊങ്കൺ മേഖലയിലെ ഈ പര്യവേക്ഷണം. അടുത്തിടെ ആൻഡമാൻ മേഖലയിലും വൻ എണ്ണശേഖരമുണ്ടെന്ന് കരുതുന്ന പ്രദേശത്ത് ഇന്ത്യ പര്യവേക്ഷണ നടപടികൾക്ക് തുടക്കമിട്ടിരുന്നു.