തിരുവനന്തപുരം: സംസ്ഥാനത്ത് ഇന്നും പരക്കെ മഴയ്ക്ക് സാധ്യതയുണ്ടെന്ന് കാലാവസ്ഥാ കേന്ദ്രം മുന്നറിയിപ്പ് നൽകി. പ്രത്യേകിച്ചൊരു ജില്ലയിലും നിലവിൽ മുന്നറിയിപ്പില്ലെങ്കിലും, ഒറ്റപ്പെട്ടയിടങ്ങളിൽ മഴ ശക്തിപ്പെടാൻ സാധ്യതയുണ്ട്. അതേസമയം, 'ഡിറ്റ് വാ' ചുഴലിക്കാറ്റിന്റെ സ്വാധീനഫലമായി കേരളത്തിലെ മിക്ക ജില്ലകളിലും ദിവസം മുഴുവൻ തണുത്ത അന്തരീക്ഷ സ്ഥിതി തുടരുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.(Cyclone Ditwah, Cold weather to continue in Kerala)
'ഡിറ്റ് വാ' ചുഴലിക്കാറ്റിന്റെ ഭാഗമായുള്ള മേഘങ്ങൾ കഴിഞ്ഞ രണ്ട് ദിവസമായി കേരളത്തിന്റെ അന്തരീക്ഷത്തിന് മുകളിൽ തങ്ങി നിൽക്കുന്നതാണ് പകൽ സമയത്തുപോലും തണുത്ത കാലാവസ്ഥയ്ക്ക് കാരണം. സ്ഥിതി കൂടുതൽ വ്യത്യസ്തമാണ്. തിരുവനന്തപുരം, കൊല്ലം, പത്തനംതിട്ട അടക്കമുള്ള തെക്കൻ ജില്ലകളിൽ പകൽ സമയങ്ങളിൽ പോലും മൂടിക്കെട്ടിയ കാലാവസ്ഥയും തണുപ്പുമാണ് അനുഭവപ്പെടുന്നത്.
വടക്കൻ കേരളത്തിൽ രാത്രിയും പുലർച്ചെയുമാണ് സാധാരണയായി തണുപ്പ് അനുഭവപ്പെടുന്നത്. ഇന്ന് ഉച്ചവരെ ഇത്തരത്തിൽ തണുത്ത കാലാവസ്ഥ തുടരുമെന്നും, അതിനുശേഷം മേഘങ്ങൾ നീങ്ങിത്തുടങ്ങുമെന്നുമാണ് കാലാവസ്ഥാ നിരീക്ഷണ കേന്ദ്രത്തിന്റെ വിലയിരുത്തൽ.