തിരുവനന്തപുരം: യുവതിയുടെ സൈബർ അധിക്ഷേപ പരാതിയിൽ കൂടുതൽ പേർക്കെതിരെ നടപടിയുണ്ടാകുമെന്ന് എ.ഡി.ജി.പി. എസ്. ശ്രീജിത്ത്. ഇരയ്ക്ക് സംരക്ഷണം നൽകാൻ പോലീസ് ബാധ്യസ്ഥരാണെന്നും, അവരുടെ ഐഡൻ്റിറ്റി ഒരു കാരണവശാലും വെളിപ്പെടുത്താൻ പാടില്ലെന്നും അദ്ദേഹം വ്യക്തമാക്കി.
സൈബർ ഗ്രൂപ്പുകൾക്കെതിരെയും വ്യക്തിഗത കുറ്റക്കാർക്കെതിരെയും കൃത്യമായ പ്രോസിക്യൂഷൻ നടപടി ഉണ്ടാകും. പരാതിയിൽ പേരെടുത്ത് പറഞ്ഞിരിക്കുന്ന കൂടുതൽ പേർക്കെതിരെയും ഉടൻ നടപടിയെടുക്കുമെന്നും ശ്രീജിത്ത് ഉറപ്പുനൽകി. പരാതിയിൽ ഉൾപ്പെട്ട എല്ലാവരുടെയും യു.ആർ.എൽ. (URL- വിലാസം) വച്ച് ഒരു പൊതു എഫ്.ഐ.ആർ. ആണ് തയ്യാറാക്കിയിരിക്കുന്നത്. ഓരോരുത്തരുടെയും പോസ്റ്റ് പരിശോധിച്ച് പ്രതിയാക്കും.
അതിജീവിതയുടെ അവകാശങ്ങൾ സംരക്ഷിക്കാനും സൈബറിടത്തിലെ അതിക്രമങ്ങൾ തടയാനും പോലീസ് ശക്തമായ നിലപാടെടുക്കുമെന്നാണ് എ.ഡി.ജി.പി. അറിയിച്ചിരിക്കുന്നത്.