കൊച്ചി: നികുതി വെട്ടിച്ച് ഭൂട്ടാനിൽ നിന്ന് കേരളത്തിലേക്ക് വാഹനങ്ങൾ കടത്തുന്ന 'ഓപ്പറേഷൻ നുംഖോർ' പരിശോധനയുടെ ഭാഗമായി കസ്റ്റംസ് പിടിച്ചെടുത്ത നടൻ അമിത് ചക്കാലക്കലിന്റെ ഒരു വാഹനം വിട്ടുനൽകി. മധ്യപ്രദേശ് രജിസ്‌ട്രേഷനിലുള്ള ലാന്റ് ക്രൂയിസർ വാഹനമാണ് വ്യവസ്ഥകളോടെ വിട്ടുനൽകിയത്.(Customs releases vehicle belonging to Amit Chakkalackal seized in Operation Numkhor)
നടന്റെ അപേക്ഷ പരിഗണിച്ചാണ് കസ്റ്റംസ് അഡീഷണൽ കമ്മീഷണറുടെ നടപടി. ബോണ്ടിന്റെയും 20 ശതമാനം ബാങ്ക് ഗ്യാരണ്ടിയുടെയും അടിസ്ഥാനത്തിലാണ് വാഹനം വിട്ടുനൽകിയത്. വാഹനം ഉപയോഗിക്കരുത്, കേരളത്തിന് പുറത്തുകൊണ്ടു പോകരുത് തുടങ്ങിയ വ്യവസ്ഥകളോടെയാണ് കസ്റ്റംസ് അനുമതി നൽകിയിട്ടുള്ളത്.
അമിത് ചക്കാലക്കലിന്റെ ഗ്യാരേജിൽനിന്ന് കസ്റ്റംസ് വാഹനങ്ങൾ പിടിച്ചെടുത്തിരുന്നു. അറ്റകുറ്റപ്പണികൾക്കാണ് വാഹനങ്ങൾ ഗ്യാരേജിൽ കൊണ്ടുവന്നതെന്നാണ് അമിത് കസ്റ്റംസിന് മൊഴി നൽകിയത്. അദ്ദേഹം പലതവണ കസ്റ്റംസിന് മുന്നിൽ ഹാജരായി രേഖകൾ ഹാജരാക്കിയിരുന്നു. ഭൂട്ടാൻ കാർ കള്ളക്കടത്ത് കേസിൽ എൻഫോഴ്‌സ്‌മെന്റ് ഡയറക്ടറേറ്റും (ഇ.ഡി.) അന്വേഷണം നടത്തുന്നുണ്ട്. വ്യാജരേഖകളുണ്ടാക്കി ഇന്ത്യയിലേക്ക് വാഹനമെത്തിച്ച ഇടനിലക്കാർ, കച്ചവടക്കാർ, വാഹനം വാങ്ങിയവർ എന്നിവരെ കേന്ദ്രീകരിച്ചാണ് ഇ.ഡി.യുടെ അന്വേഷണം.
ഭൂട്ടാൻ കാർ കള്ളക്കടത്തിലെ കള്ളപ്പണ ഇടപാടാണ് ഇ.ഡി.യുടെ അന്വേഷണ പരിധിയിലുള്ളത്. വ്യാജ രേഖകൾ വഴി കാർ ഇറക്കുമതി ചെയ്‌തെന്ന് കണ്ടെത്തിയതിനെത്തുടർന്ന് നടൻ അമിത് ചക്കാലക്കൽ അടക്കമുള്ളവർക്ക് അന്വേഷണ സംഘം നേരത്തെ നോട്ടീസ് നൽകിയിരുന്നു. നടൻ ദുൽഖറിനും നോട്ടീസ് നൽകിയിരുന്നു. കേസുമായി ബന്ധപ്പെട്ട് ഭൂട്ടാനിൽനിന്ന് കേരളത്തിലേക്ക് വാഹനം കടത്തുന്ന ഇടനിലക്കാർക്കായുള്ള അന്വേഷണം കസ്റ്റംസും ഇ.ഡി.യും തുടരുകയാണ്.