തിരുവനന്തപുരം: തദ്ദേശ തിരഞ്ഞെടുപ്പിലെ അപ്രതീക്ഷിത തോൽവിയുടെ പശ്ചാത്തലത്തിൽ, വീഴ്ചകൾ പരിഹരിക്കാനും സംഘടനയെ ശക്തിപ്പെടുത്താനുമുള്ള നിർണ്ണായകമായ സിപിഎം സംസ്ഥാന സമിതി യോഗം ഇന്ന് ആരംഭിക്കും. രണ്ടു ദിവസം നീളുന്ന യോഗത്തിൽ തിരഞ്ഞെടുപ്പ് ഫലം സംബന്ധിച്ച വിശദമായ അവലോകനവും തിരുത്തൽ നടപടികളും ചർച്ചയാകും.(CPM to overcome setback in local body elections, State committee meeting today)
ഇന്നലെ ചേർന്ന സംസ്ഥാന സെക്രട്ടേറിയറ്റ് യോഗം തിരഞ്ഞെടുപ്പ് ഫലം പ്രാഥമികമായി വിലയിരുത്തിയിരുന്നു. ഇതിന്റെ തുടർച്ചയായാണ് ഇന്നത്തെ സംസ്ഥാന സമിതി. ഭരണവിരുദ്ധ വികാരം സംസ്ഥാന തലത്തിൽ ഇല്ലെങ്കിലും പ്രാദേശിക ഭരണകൂടങ്ങൾക്കെതിരെ ജനവികാരം പ്രകടമായിട്ടുണ്ട്. തിരുവനന്തപുരം കോർപറേഷൻ ഉൾപ്പെടെയുള്ള ഇടങ്ങളിൽ നേരിട്ട തോൽവി ഗൗരവത്തോടെയാണ് പാർട്ടി കാണുന്നത്.
ശബരിമല സ്വർണക്കൊള്ളക്കേസിൽ അറസ്റ്റിലായ ദേവസ്വം ബോർഡ് മുൻ പ്രസിഡന്റിനെതിരെ കർശന നടപടി വൈകിയത് തിരഞ്ഞെടുപ്പിൽ തിരിച്ചടിയായെന്ന് സെക്രട്ടേറിയറ്റ് വിലയിരുത്തി. പ്രതിപക്ഷം ഇത് പ്രചാരണ ആയുധമാക്കിയപ്പോൾ പ്രതിരോധിക്കാൻ പാർട്ടിക്ക് കഴിഞ്ഞില്ലെന്നും നിരീക്ഷണമുണ്ട്.
സംഘടനാരംഗത്തെ പോരായ്മകൾ പരിഹരിക്കാൻ വ്യക്തമായ 'ആക്ഷൻ പ്ലാൻ' യോഗത്തിൽ രൂപീകരിക്കും. താഴെത്തട്ടിൽ പാർട്ടിയും ജനങ്ങളും തമ്മിലുള്ള ബന്ധം ദൃഢമാക്കാനുള്ള നിർദ്ദേശങ്ങൾ ഇതിലുണ്ടാകും. തിരഞ്ഞെടുപ്പിലെ തോൽവിക്ക് പിന്നാലെ കേന്ദ്ര സർക്കാരിനെതിരായ സമരം ശക്തമാക്കാനും സിപിഎം തീരുമാനിച്ചിട്ടുണ്ട്. ക്ഷേമ പെൻഷൻ വിഹിതം മുടക്കിയത്, വായ്പാ പരിധി വെട്ടിക്കുറച്ചത് തുടങ്ങിയ വിഷയങ്ങൾ ഉയർത്തിക്കാട്ടി ജനങ്ങൾക്കിടയിലേക്ക് ഇറങ്ങാനാണ് തീരുമാനം. പ്രക്ഷോഭ പരിപാടികൾ ആസൂത്രണം ചെയ്യുന്നതിനായി എൽഡിഎഫ് നേതൃയോഗവും ഇന്ന് ചേരുന്നുണ്ട്.