കണ്ണൂർ: പാനൂർ പാറാട് ബ്രാഞ്ച് കമ്മിറ്റി ഓഫീസിലാണ് തീപിടുത്തമുണ്ടായത്. വൈകുന്നേരം രാഷ്ട്രീയ വിശദീകരണ യോഗത്തിന് മുന്നോടിയായി പ്രവർത്തകർ ഓഫീസ് തുറന്നപ്പോഴാണ് വിവരമറിയുന്നത്. ഓഫീസിനുള്ളിൽ സൂക്ഷിച്ചിരുന്ന പതാകകൾ, തോരണങ്ങൾ, പോസ്റ്ററുകൾ എന്നിവ പൂർണ്ണമായും കത്തിയമർന്നു. തിരഞ്ഞെടുപ്പ് കമ്മിറ്റി ഓഫീസായും ഈ കെട്ടിടം പ്രവർത്തിച്ചിരുന്നു.
അടച്ചിട്ട ഓഫീസിന്റെ എയർഹോൾ വഴി പെട്രോൾ അകത്തേക്ക് ഒഴിച്ച് തീയിട്ടതാണെന്നാണ് സിപിഎം ആരോപിക്കുന്നത്. കുന്നോത്തുപറമ്പ് പഞ്ചായത്ത് ഭരണം യുഡിഎഫ് പിടിച്ചതിന് പിന്നാലെ പാനൂർ, പാറാട് മേഖലകളിൽ വലിയ തോതിൽ സംഘർഷം നിലനിന്നിരുന്നു. സിപിഎം ജില്ലാ സെക്രട്ടറി കെ.കെ. രാഗേഷ് ഉൾപ്പെടെയുള്ളവർ പങ്കെടുത്ത യോഗത്തിന് തൊട്ടുമുമ്പാണ് ഈ അക്രമം നടന്നത്.
സംഭവത്തിന് പിന്നിൽ മുസ്ലിം ലീഗ് പ്രവർത്തകരാണെന്ന് സിപിഎം ആരോപിച്ചു. എന്നാൽ മുൻപ് നടന്ന സംഘർഷങ്ങളുമായി ബന്ധപ്പെട്ട് നിരവധി സിപിഎം പ്രവർത്തകർക്കെതിരെ പോലീസ് അന്വേഷണം നടന്നുവരികയായിരുന്നു. സംഭവം നടന്നതോടെ പാനൂർ മേഖലയിൽ പോലീസ് സുരക്ഷ ശക്തമാക്കിയിട്ടുണ്ട്. ഫോറൻസിക് വിദഗ്ധരും പോലീസും സ്ഥലത്തെത്തി പരിശോധന നടത്തി. പ്രദേശത്ത് സമാധാനം നിലനിർത്താൻ ജനങ്ങൾ സഹകരിക്കണമെന്ന് അധികൃതർ അഭ്യർത്ഥിച്ചു.