കണ്ണൂർ: അരിയിൽ ഷുക്കൂർ വധവുമായി ബന്ധപ്പെട്ട സംഘർഷത്തിനിടെ പോലീസിനു നേരെ ബോംബെറിഞ്ഞ കേസിൽ ശിക്ഷിക്കപ്പെട്ട സി.പി.എം നേതാവ് വി.കെ. നിഷാദിന് പരോൾ. പിതാവിന്റെ അസുഖം പരിഗണിച്ച് ആറ് ദിവസത്തെ അടിയന്തര പരോളാണ് ജയിൽ അധികൃതർ അനുവദിച്ചത്. കണ്ണൂർ സെൻട്രൽ ജയിലിൽ ശിക്ഷ അനുഭവിച്ചു വരികയായിരുന്നു ഇദ്ദേഹം.
ശിക്ഷ: കഴിഞ്ഞ മാസമാണ് ഈ കേസിൽ നിഷാദിനെ കോടതി 20 വർഷത്തെ തടവിന് ശിക്ഷിച്ചത്. കഴിഞ്ഞ തദ്ദേശ തിരഞ്ഞെടുപ്പിൽ പയ്യന്നൂർ നഗരസഭയിലെ 46-ാം വാർഡായ മൊട്ടമ്മലിൽ നിന്ന് സി.പി.എം സ്ഥാനാർത്ഥിയായി മത്സരിച്ച നിഷാദ് വൻ ഭൂരിപക്ഷത്തിൽ വിജയിച്ചിരുന്നു. എന്നാൽ കേസിൽ ശിക്ഷിക്കപ്പെട്ട് ജയിലിലായതിനാൽ ഇദ്ദേഹത്തിന് ഇതുവരെ കൗൺസിലറായി സത്യപ്രതിജ്ഞ ചെയ്യാൻ സാധിച്ചിട്ടില്ല.
നിലവിൽ കൊലപാതകം, വധശ്രമം, പൊതുമുതൽ നശിപ്പിക്കൽ തുടങ്ങി 16-ഓളം ക്രിമിനൽ കേസുകളിൽ പ്രതിയാണ് വി.കെ. നിഷാദ്.
ഷുക്കൂർ വധക്കേസിന് പിന്നാലെയുണ്ടായ രാഷ്ട്രീയ സംഘർഷങ്ങൾക്കിടെ പോലീസിനെ ലക്ഷ്യം വെച്ച് ബോംബാക്രമണം നടത്തിയെന്നതാണ് ഇദ്ദേഹത്തിനെതിരെയുള്ള പ്രധാന കേസ്. പരോൾ കാലാവധിക്ക് ശേഷം ഇദ്ദേഹം തിരികെ ജയിലിൽ ഹാജരാകണം.