തിരുവനന്തപുരം: പി.എം. ശ്രീ പദ്ധതിയുടെ നടത്തിപ്പുമായി ബന്ധപ്പെട്ട് ഇടതുപക്ഷ ജനാധിപത്യ മുന്നണിയിൽ (എൽ.ഡി.എഫ്.) ഉയർന്നുവന്ന ഭിന്നതകൾ പരിഹരിക്കുന്നതിൽ നിർണായക പങ്ക് വഹിച്ച സി.പി.ഐ.എം. ജനറൽ സെക്രട്ടറി എം.എ. ബേബിക്ക് അഭിനന്ദനം. സി.പി.ഐ. ദേശീയ സെക്രട്ടറിയേറ്റ് അംഗം കെ. പ്രകാശ് ബാബു ജനയുഗം പത്രത്തിൽ എഴുതിയ ലേഖനത്തിലാണ് ഈ പ്രശംസ.(CPI mouthpiece congratulates MA Baby on PM SHRI controversy)
സംസ്ഥാനത്ത് നിലനിന്ന രാഷ്ട്രീയ പ്രതിസന്ധിക്ക് പരിഹാരം കാണാനായി എം.എ. ബേബി കേരളത്തിൽ താമസിച്ച് സി.പി.ഐ., സി.പി.ഐ.എം. സംസ്ഥാന സെക്രട്ടറിമാരുമായും സി.പി.ഐ. ജനറൽ സെക്രട്ടറി ഡി. രാജയുമായും ബന്ധപ്പെട്ടു. കൃത്യസമയത്തുള്ള ഈ ഇടപെടലുകൾ ഫലം കണ്ടതായും, കേരള മുഖ്യമന്ത്രി എല്ലാ ചർച്ചകൾക്കും നേതൃത്വം നൽകിയതായും ലേഖനത്തിൽ കെ. പ്രകാശ് ബാബു കുറിച്ചു. ഈ സാഹചര്യത്തെ ക്രിയാത്മകമായി ഉപയോഗിച്ചുകൊണ്ട് ഇടതുപക്ഷ രാഷ്ട്രീയം ഉയർത്തിപ്പിടിച്ച് എൽ.ഡി.എഫ്. മുന്നോട്ട് പോകുമെന്ന വ്യക്തമായ സന്ദേശം ജനങ്ങൾക്ക് നൽകാൻ നേതൃത്വത്തിന് കഴിഞ്ഞുവെന്നും അദ്ദേഹം അഭിപ്രായപ്പെട്ടു.
പി.എം. ശ്രീ പദ്ധതിയിൽ പലരും പ്രധാനമായി ഉയർത്തിക്കാട്ടുന്ന അടിസ്ഥാന സൗകര്യ വികസനത്തെക്കുറിച്ച് ലേഖനം ചില വസ്തുതകൾ നിരത്തുന്നുണ്ട്. കേരളത്തിലെ എൽ.ഡി.എഫ്. സർക്കാർ കഴിഞ്ഞ ഒമ്പത് വർഷം കൊണ്ട് 50,000-ത്തിലധികം ക്ലാസ് മുറികൾ ഹൈടെക് ആക്കുകയും സർക്കാർ സ്കൂളുകളുടെ അടിസ്ഥാന സൗകര്യങ്ങൾ അന്താരാഷ്ട്ര നിലവാരത്തിലേക്ക് ഉയർത്തുകയും ചെയ്തത് സംസ്ഥാനത്തിന് അഭിമാനകരമായ നേട്ടമാണെന്ന് ലേഖകൻ ചൂണ്ടിക്കാട്ടുന്നു.ഈ പദ്ധതിയുടെ വ്യവസ്ഥകൾ അനുസരിച്ച്, ഒരു സ്കൂളിന് അഞ്ച് അധ്യയന വർഷം കൊണ്ട് (2022-23 മുതൽ 2026-27 വരെ) 85 ലക്ഷം മുതൽ 1.13 കോടി രൂപ വരെ ധനസഹായം ലഭിക്കും. ഇത് 60:40 എന്ന അനുപാതത്തിൽ കേന്ദ്ര-സംസ്ഥാന സർക്കാരുകൾ പങ്കിടേണ്ടതുണ്ട്.
കേന്ദ്ര സർക്കാരിന്റെ വർഗീയ ഹിന്ദുത്വ അജണ്ട സ്കൂൾതല വിദ്യാർഥികളിലേക്ക് വ്യാപിപ്പിക്കാനുള്ള നീക്കത്തിന്റെ അപകടം തിരിച്ചറിഞ്ഞാണ് ഇന്ത്യയിലെ ഇടതുപക്ഷം രാജ്യവ്യാപകമായ പ്രക്ഷോഭങ്ങളും പ്രചരണങ്ങളും നടത്തിയതെന്നും ലേഖനത്തിൽ കെ. പ്രകാശ് ബാബു വ്യക്തമാക്കുന്നു.
അതേസമയം, പി.എം. ശ്രീ പദ്ധതിയുടെ ധാരണാപത്രം ഒപ്പിട്ടതിലെ പാളിച്ചകൾക്ക് ഉദ്യോഗസ്ഥരെ പരോക്ഷമായി വിമർശിക്കാനും ലേഖകൻ മടിച്ചില്ല. കേന്ദ്ര അനുകൂല നിലപാടുള്ള ഉദ്യോഗസ്ഥർ തന്ത്രപരമായ നീക്കങ്ങളിലൂടെ പല സംസ്ഥാനങ്ങളിലും പദ്ധതി നടപ്പിലാക്കി. കേരളത്തിൽ, ഭരണ-രാഷ്ട്രീയ നേതൃത്വങ്ങളുമായി ആവശ്യമായ കൂടിയാലോചനകൾ നടത്താതെയാണ് ധാരണാപത്രം ഒപ്പിട്ടതെന്നും, ഇത് മുന്നണിയിൽ ചില അസ്വാരസ്യങ്ങൾക്ക് കാരണമായെന്നും പ്രകാശ് ബാബു ചൂണ്ടിക്കാട്ടി.