തൃശ്ശൂർ: ലൈംഗിക പീഡനക്കേസിൽ പ്രതിയായ രാഹുൽ മാങ്കൂട്ടത്തിൽ എം.എൽ.എയുടെ വിഷയത്തിൽ നിയമസംവിധാനത്തെ വെല്ലുവിളിക്കാൻ കോൺഗ്രസ് ഇല്ലെന്ന് കെ.പി.സി.സി. നേതാവ് വി.ടി. ബൽറാം പറഞ്ഞു. "രാഹുൽ മാങ്കൂട്ടത്തിലിനെതിരെ ആരോപണം വന്ന ഘട്ടത്തിൽ തന്നെ പാർട്ടി ഉചിതമായ നടപടി സ്വീകരിച്ചതാണ്." നിയമം നിയമത്തിന്റെ വഴിക്ക് പോകട്ടെയെന്നും അദ്ദേഹം കൂട്ടിച്ചേർത്തു.(Congress will not be challenging the legal system, VT Balram on Rahul Mamkootathil issue)
"ഞങ്ങളെ തൊട്ടാൽ തീപ്പന്തമാകും എന്ന് മുഖ്യമന്ത്രി പിണറായി വിജയൻ വെല്ലുവിളിച്ചത് പോലെ നിയമസംവിധാനത്തെ വെല്ലുവിളിക്കാൻ കോൺഗ്രസ് ഇല്ല," വി.ടി. ബൽറാം പറഞ്ഞു. കെ.പി.സി.സി. ഡിജിറ്റൽ മീഡിയാ സെൽ ചുമതല ഒഴിഞ്ഞതുമായി ബന്ധപ്പെട്ട വിഷയത്തിലും വി.ടി. ബൽറാം പ്രതികരിച്ചു. ഇന്ന് ഡിജിറ്റൽ സെല്ലിന്റെ ചുമതല ഹൈബി ഈഡന് നൽകിയിരുന്നു. നേരത്തെ 'ബീഡി-ബിഹാർ' പോസ്റ്റിനെ തുടർന്ന് വി.ടി. ബൽറാം ഈ ചുമതല രാജിവെച്ച ഒഴിവിലാണ് പുതിയ നിയമനം.
സണ്ണി ജോസഫ് കെ.പി.സി.സി. അധ്യക്ഷനായപ്പോൾ തന്നെ പുനഃസംഘടന ആലോചിച്ചിരുന്നതാണ്. നിലമ്പൂർ ഉപതിരഞ്ഞെടുപ്പ് വന്നതിനാലാണ് പുനഃസംഘടന നീണ്ടുപോയതെന്നും, ഇപ്പോൾ നടന്നത് ഉചിതമായ പുനഃസംഘടനയാണെന്നും വി.ടി. ബൽറാം അഭിപ്രായപ്പെട്ടു. രാഹുൽ വിവാദത്തിൽ കടുത്ത നിലപാടെടുത്ത പ്രതിപക്ഷ നേതാവിനെതിരെ പാർട്ടി ഹാൻഡിലുകൾ കടന്നാക്രമണം നടത്തിയ പശ്ചാത്തലത്തിൽ കൂടിയാണ് ഈ അഴിച്ചുപണി നടന്നത്.