തിരുവനന്തപുരം: പാലക്കാട് എം.എൽ.എ. രാഹുൽ മാങ്കൂട്ടത്തിൽ ഉൾപ്പെട്ട വിവാദത്തിൽ കോൺഗ്രസ് ഒളിച്ചോടിയിട്ടില്ലെന്നും ഇക്കാര്യത്തിൽ പാർട്ടിയിൽ രണ്ടഭിപ്രായമില്ലെന്നും എ.ഐ.സി.സി. ജനറൽ സെക്രട്ടറി കെ.സി. വേണുഗോപാൽ. തദ്ദേശ തിരഞ്ഞെടുപ്പിൽ വിഷയം കോൺഗ്രസിനെ ബാധിക്കില്ലെന്നും അദ്ദേഹം കൊച്ചിയിൽ പറഞ്ഞു.(Congress united on Rahul Mamkootathil issue, says KC Venugopal)
"രാഹുൽ മാങ്കൂട്ടത്തിലിന്റെ വിഷയത്തിൽ പാർട്ടി നിലപാട് വ്യക്തമാക്കിയതാണ്. പ്രധാനപ്പെട്ട നേതാക്കളും അത് വ്യക്തമാക്കിക്കഴിഞ്ഞു. ഈ വിഷയം മാത്രമാണോ ചർച്ച ചെയ്യാനുള്ളത്? കേരള സർക്കാരിന്റെ വിഷയങ്ങൾ ചർച്ചചെയ്യാനില്ലേ?" എന്ന് കെ.സി. വേണുഗോപാൽ ചോദിച്ചു. ഈ വിഷയത്തിൽ പാർട്ടി എടുക്കേണ്ട എല്ലാ നടപടികളും സ്വീകരിച്ചു കഴിഞ്ഞു.
കോൺഗ്രസ് ഇക്കാര്യത്തിൽ ഒറ്റക്കെട്ടായി എടുത്ത തീരുമാനമാണ്, ഭിന്നാഭിപ്രായമില്ലെന്നും അദ്ദേഹം വ്യക്തമാക്കി. എന്നാൽ, പരാതിക്കാരിക്ക് എതിരായ സൈബർ ആക്രമണത്തെക്കുറിച്ച് പ്രതികരിക്കാൻ അദ്ദേഹം തയ്യാറായില്ല.
കേരളത്തിലെ സർക്കാരിനെ ജനങ്ങൾ മടുത്തിരിക്കുകയാണ്. അത് ഈ തിരഞ്ഞെടുപ്പിൽ പ്രതിഫലിക്കും. കോൺഗ്രസും യു.ഡി.എഫും ദിശാബോധത്തോടെയാണ് നീങ്ങുന്നത്. "മോദി സർക്കാരിന്റെ പരിപാടികൾ നടപ്പാക്കാനുള്ള തിടുക്കമാണ് പിണറായി സർക്കാരിനുള്ളത്. മോദിക്ക് മുന്നിൽ വിധേയനായി നിന്നുകൊണ്ട് വർഗീയ നയങ്ങൾ നടപ്പിലാക്കുകയാണ് സംസ്ഥാന സർക്കാർ," കെ.സി. വേണുഗോപാൽ കുറ്റപ്പെടുത്തി.
ശശി തരൂരിന്റെ ഭിന്നാഭിപ്രായങ്ങളെ കോൺഗ്രസിലെ ജനാധിപത്യത്തിന്റെ സൗന്ദര്യമായാണ് കെ.സി. വേണുഗോപാൽ വിശേഷിപ്പിച്ചത്. കോൺഗ്രസിൽ ആർക്കും അഭിപ്രായം പറയാൻ സ്വാതന്ത്ര്യമുണ്ട്. എങ്കിലും, "എത്ര ശക്തമായാണ് തിരഞ്ഞെടുപ്പിൽ മോദിയെ എതിർത്തു തോൽപ്പിക്കാൻ വേണ്ടി പ്രവർത്തിച്ചതെന്ന് ഭിന്നാഭിപ്രായം പറയുന്നവർ ആലോചിക്കണം" എന്നും അദ്ദേഹം പറഞ്ഞു.
നാഷണൽ ഹെറാൾഡ് കേസിലെ ഇ.ഡി. നടപടി കോൺഗ്രസിനെ ലക്ഷ്യമിട്ടുള്ള രാഷ്ട്രീയ വേട്ടയാടലാണ്. "ഈ കേസ് കൊണ്ടൊന്നും ഭയപ്പെടുത്തേണ്ട. കേന്ദ്ര ഏജൻസികൾ വേട്ടയാടുന്നതിൽ പുതുമയില്ലല്ലോ," രാഹുൽ ഗാന്ധിക്കും സോണിയാ ഗാന്ധിക്കുമെതിരെ പുതിയ എഫ്.ഐ.ആർ. രജിസ്റ്റർ ചെയ്തതിനോട് പ്രതികരിച്ചുകൊണ്ട് കെ.സി. വേണുഗോപാൽ പറഞ്ഞു.