തിരുവനന്തപുരം: നിയമസഭാ തിരഞ്ഞെടുപ്പിനുള്ള സ്ഥാനാർഥി നിർണയ നടപടികൾ വേഗത്തിലാക്കാൻ കോൺഗ്രസ് സ്ക്രീനിങ് കമ്മിറ്റി ചർച്ചകൾ സജീവമാക്കി. മധുസൂദനൻ മിസ്ത്രിയുടെ നേതൃത്വത്തിലുള്ള സമിതി ഇന്ന് എംപിമാർ ഉൾപ്പെടെയുള്ള പ്രധാന നേതാക്കളുടെ അഭിപ്രായം തേടും.(Congress to speed up candidate selection for the Assembly elections)
തിരുവനന്തപുരത്ത് തുടരുന്ന സമിതി ഇന്നലെ മുതിർന്ന നേതാവ് എ.കെ. ആന്റണി ഉൾപ്പെടെയുള്ളവരുമായി കൂടിക്കാഴ്ച നടത്തിയിരുന്നു. എന്നാൽ, ഇന്നലെ നടന്ന ചർച്ചകളിൽ പ്രതിപക്ഷ നേതാവ് പങ്കെടുത്തിരുന്നില്ല. വരും ദിവസങ്ങളിൽ സംസ്ഥാനത്തെ വിവിധ തലങ്ങളിലുള്ള നേതാക്കളുമായും സമിതി ആശയവിനിമയം നടത്തും.
വിവിധ തലങ്ങളിലെ ചർച്ചകൾക്ക് ശേഷം സ്ഥാനാർഥി നിർണയത്തിനുള്ള മാനദണ്ഡങ്ങൾ സമിതി ഔദ്യോഗികമായി തീരുമാനിക്കും. യുവാക്കൾക്കും പുതുമുഖങ്ങൾക്കും നൽകേണ്ട പ്രാധാന്യം സംബന്ധിച്ചും ചർച്ചകളുണ്ടാകും. സ്ഥാനാർഥി പ്രഖ്യാപനം രണ്ട് ഘട്ടങ്ങളിലായി പൂർത്തിയാക്കാനാണ് പാർട്ടി ലക്ഷ്യമിടുന്നത്. തർക്കമില്ലാത്ത സീറ്റുകളിലെ സ്ഥാനാർഥികളെ ആദ്യ ഘട്ടത്തിൽ തന്നെ പ്രഖ്യാപിച്ചേക്കും.
നിലവിൽ രണ്ടു ദിവസം കേരളത്തിൽ തങ്ങുന്ന സമിതി അംഗങ്ങൾ, കെപിസിസി നൽകുന്ന പ്രാഥമിക പട്ടിക പരിശോധിച്ച ശേഷം വീണ്ടും കേരളത്തിലെത്തും. ഗ്രൂപ്പ് സമവാക്യങ്ങൾക്കപ്പുറം വിജയസാധ്യതയ്ക്ക് മുൻതൂക്കം നൽകിക്കൊണ്ടുള്ള പട്ടിക തയ്യാറാക്കാനാണ് ഹൈക്കമാൻഡ് നിർദ്ദേശം.