തിരുവനന്തപുരം: രാഹുല്‍ മാങ്കൂട്ടത്തില്‍ എംഎല്‍എയ്‌ക്കെതിരായ യുവതിയുടെ പരാതിയില്‍ പ്രതികരണവുമായി എല്‍ഡിഎഫ് കണ്‍വീനര്‍ ടി പി രാമകൃഷ്ണന്‍. പരാതി ഇല്ലെന്ന കോണ്‍ഗ്രസിന്റെ പ്രശ്‌നം തീര്‍ന്നെന്നും യുവതി മുഖ്യമന്ത്രിക്ക് പരാതി നല്‍കിയല്ലോ എന്നും ടി പി രാമകൃഷ്ണന്‍ പറഞ്ഞു.
രാഹുല്‍ മാങ്കൂട്ടത്തിലിന്റെ വിഷയത്തില്‍ മറുപടി പറയേണ്ടത് കോണ്‍ഗ്രസാണ്. കോണ്‍ഗ്രസിന്റെ വികൃത മുഖമാണ് ഇതിലൂടെ അനാവരണം ചെയ്യപ്പെടുന്നത്.സസ്പെൻഷനാണ് പ്രധാനപ്പെട്ട നടപടിയായി വിഡി സതീശൻ ചൂണ്ടിക്കാട്ടുന്നത്.രാഹുൽ ഒരു തെറ്റും ചെയ്തിട്ടില്ലെന്നാണ് കെ സുധാകരൻ പറയുന്നത്. എംഎൽഎ സ്ത്രീയുടെ ആരോപണത്തെ തുടർന്ന് ഒളിവിൽ പോകേണ്ടിവരുന്നു. ഇത് അപമാനകരമാണ്. ഇത്തരം കുറ്റം ചെയ്യുന്നവരെ കോൺഗ്രസ് സംരക്ഷിക്കുന്നത് എന്തിന്. പരാതി ഉന്നയിച്ച സ്ത്രീകളെ അപമാനിക്കുന്ന തരത്തിലുള്ള അഭിപ്രായങ്ങളാണ് കോണ്‍ഗ്രസിന്റെ ഭാഗത്ത് നിന്ന് ഉണ്ടാകുന്നത്.
പരാതി ഇല്ലെന്നായിരുന്നു ഇതുവരെ പറഞ്ഞത്. ഇപ്പോൾ പരാതി വന്നല്ലോ. മുഖ്യമന്ത്രിക്ക് അല്ലല്ലോ പൊലീസ് സ്റ്റേഷനിൽ അല്ലേ പരാതി കൊടുക്കേണ്ടത് എന്നാണ് ദീപ ദാസ് മുൻഷി പറഞ്ഞത്.മുകേഷിന്റെ കേസുമായി ഇതിനെ താരതമ്യം ചെയ്യാനാവില്ല. രാഹുല്‍ മാങ്കൂട്ടത്തില്‍ പൊതുജീവിതത്തില്‍ നിന്ന് മാറി നിന്ന് നിരപരാധിത്വം തെളിയിക്കണം. അതിന് പ്രേരിപ്പിക്കേണ്ടത് കോണ്‍ഗ്രസാണ്. മൂല്യബോധം ഉയര്‍ത്തിപ്പിടിക്കാന്‍ തയ്യാറാകണം. പാര്‍ട്ടിക്ക് ഏകീകൃതമായി ഒരു നിലപാടില്ല എന്ന കാര്യം വ്യക്തമാക്കുന്നതാണ് ഓരോരുത്തരും വ്യത്യസ്ത അഭിപ്രായങ്ങള്‍ പറയുന്നതെന്ന് ടി പി രാമകൃഷ്ണന്‍ കൂട്ടിച്ചേര്‍ത്തു.