പാലക്കാട്: ബലാത്സംഗക്കേസിൽ ഒളിവിലുള്ള എം.എൽ.എ. രാഹുൽ മാങ്കൂട്ടത്തിൽ വിഷയം വരാനിരിക്കുന്ന തിരഞ്ഞെടുപ്പുകളിൽ കോൺഗ്രസിനെ ബാധിക്കില്ലെന്ന് പാലക്കാട് ഡി.സി.സി. അധ്യക്ഷൻ എ. തങ്കപ്പൻ. രാഹുൽ മാങ്കൂട്ടത്തിലിനെ ഒളിവിൽ കഴിയാൻ കോൺഗ്രസ് നേതാക്കൾ സഹായിക്കുന്നു എന്ന ആരോപണം അദ്ദേഹം നിഷേധിച്ചു.(Congress leaders did not help Rahul to stay in hiding, says DCC President)
"രാഹുൽ പ്രചാരണത്തിന് ഇറങ്ങിയത് പാർട്ടിയുടെ അറിവോടെയല്ല, അതിനുള്ള അനുമതി പാർട്ടി നൽകിയിട്ടില്ല. രാഹുലിനെ ഒളിവിൽ കഴിയാൻ കോൺഗ്രസ് നേതാക്കൾ സഹായിച്ചിട്ടില്ല, അത്തരം ആരോപണങ്ങൾ തെറ്റാണ്," അദ്ദേഹം പറഞ്ഞു.
ബലാത്സംഗ കേസിൽ ഒളിവിലുള്ള രാഹുൽ മാങ്കൂട്ടത്തിലിനെ അറസ്റ്റ് ചെയ്യാൻ പോലീസ് നീക്കം ശക്തമാക്കിയിട്ടുണ്ട്. മുൻകൂർ ജാമ്യാപേക്ഷ സമർപ്പിച്ചിരിക്കുന്നത് അറസ്റ്റിന് തടസ്സമല്ലെന്നാണ് പോലീസ് നിലപാട്. രാഹുൽ മാങ്കൂട്ടത്തിൽ തലസ്ഥാനത്തെത്തി വക്കാലത്തിൽ ഒപ്പിട്ടുവെന്ന പ്രചാരണം പോലീസ് തള്ളി. എല്ലാ ജില്ലകളിലും അന്വേഷണം നടത്താൻ ക്രമസമാധാന ചുമതലയുള്ള എ.ഡി.ജി.പി. നിർദ്ദേശം നൽകി.
പരാതിക്കാരിയുമായി പീഡനം നടന്ന ഫ്ലാറ്റിലെത്തി പോലീസ് മഹസ്സർ രേഖപ്പെടുത്തി. കൂടുതൽ സാക്ഷികളുടെ മൊഴിയെടുക്കുന്ന നടപടികൾ ഇന്നും തുടരും. ലൈംഗിക പീഡന കേസിൽ പരാതിക്കാരിയായ യുവതിക്കെതിരെ രാഹുൽ മാങ്കൂട്ടത്തിൽ ഇന്നലെ തിരുവനന്തപുരം ജില്ലാ കോടതിയിൽ കൂടുതൽ തെളിവുകൾ സമർപ്പിച്ചു. ഒമ്പത് തെളിവുകളാണ് സീൽഡ് കവറിലായി കോടതിയിൽ നൽകിയത്.
യുവതി ജോലി ചെയ്തിരുന്ന ചാനലിന്റെ മേധാവിയാണ് രാഹുലിനെതിരെ പരാതി കൊടുക്കാൻ പ്രേരിപ്പിച്ചത്. ഗർഭഛിദ്രം യുവതി സ്വന്തം ഇഷ്ടപ്രകാരമാണ് നടത്തിയതെന്നും സ്ഥാപിക്കുന്ന തെളിവുകളും രേഖകളുമാണ് നൽകിയത്. ബലാത്സംഗം നടന്നതായി പറയുന്ന കാലഘട്ടത്തിൽ യുവതി ഭർത്താവിനൊപ്പമാണ് കഴിഞ്ഞിരുന്നതിനുള്ള തെളിവുകളും രാഹുൽ നൽകിയ രേഖകളിൽ ഉണ്ടെന്നാണ് വിവരം.