ആലപ്പുഴ: വയലാർ ഡിവിഷനിലേക്ക് യു.ഡി.എഫ്. സ്ഥാനാർത്ഥിയായി മത്സരിക്കുന്ന ട്രാൻസ്‌വുമൺ അരുണിമ എം. കുറുപ്പിന്റെ സ്ഥാനാർത്ഥിത്വം അംഗീകരിച്ചു. നാമനിർദ്ദേശ പത്രികയുടെ സൂക്ഷ്മപരിശോധനയിൽ പത്രിക സ്വീകരിച്ചതോടെ അരുണിമയുടെ മത്സരം സംബന്ധിച്ച അനിശ്ചിതത്വം നീങ്ങി. വയലാർ ഡിവിഷൻ വനിതാ സംവരണ സീറ്റാണ്. ട്രാൻസ്‌വുമണിനെ സംവരണ സീറ്റിൽ മത്സരിപ്പിക്കുന്നതുമായി ബന്ധപ്പെട്ട് ചില പ്രചാരണങ്ങൾ പുറത്തുവന്നിരുന്നു. എന്നാൽ, സൂക്ഷ്മപരിശോധനയിൽ അധികൃതർ ഈ ആശങ്കകൾക്ക് വിരാമമിട്ടു.(Confirmation that there is no legal impediment to contesting, Arunima's candidacy accepted)
വോട്ടർ ഐ.ഡി. ഉൾപ്പെടെയുള്ള ഔദ്യോഗിക രേഖകളിലെല്ലാം അരുണിമയുടെ ലിംഗഭേദം 'സ്ത്രീ' എന്നാണ് രേഖപ്പെടുത്തിയിരിക്കുന്നത്. ഇക്കാരണത്താൽ, സ്ത്രീ സംവരണ സീറ്റിൽ മത്സരിക്കുന്നതിന് നിയമപരമായ തടസ്സമില്ലെന്ന് അധികൃതർ വ്യക്തമാക്കി. സൂക്ഷ്മപരിശോധനാ വേളയിൽ ആരും എതിർപ്പും ഉന്നയിച്ചില്ല.
സ്ഥാനാർത്ഥിത്വവുമായി ബന്ധപ്പെട്ട് പ്രചാരണങ്ങൾ വന്നതിനെതിരെ അരുണിമ എം. കുറുപ്പ് ശക്തമായി പ്രതികരിച്ചു. "ചില ആളുകളും മാധ്യമങ്ങളും ട്രാൻസ്‌ജെൻഡേഴ്സിന് സ്ത്രീ സംവരണ സീറ്റിൽ മത്സരിക്കാനാകില്ലെന്ന് പറയുന്നു. എന്നാൽ എന്റെ എല്ലാ രേഖകളിലും താൻ സ്ത്രീയാണ്. വോട്ടർ പട്ടികയിലും ആധാറിലും തെരഞ്ഞെടുപ്പ് ഐ.ഡി.യിലുമടക്കം സ്ത്രീ എന്നാണ് രേഖപ്പെടുത്തിയിരിക്കുന്നത്."
"കോൺഗ്രസ് ജയിക്കാത്ത സീറ്റല്ല വയലാർ. താൻ സ്ഥാനാർത്ഥിയായതോടെ ജയസാധ്യത യു.ഡി.എഫിനാണ്. അതിനാലാണ് ഈ ആരോപണം ഉന്നയിക്കുന്നത്. 19-ാം വയസ്സിൽ സർജറി കഴിഞ്ഞതാണ്. നിയമപരമായി ബുദ്ധിമുട്ട് ഉണ്ടാകില്ലെന്നാണ് കരുതുന്നത്."
"ലിംഗ-ലൈംഗിക ന്യൂനപക്ഷങ്ങളെ കുറിച്ച് അവബോധമില്ലാത്തവരാണ് കുപ്രചാരണം നടത്തുന്നത്. വളരെ വലിയ പോരാട്ടത്തിലൂടെയാണ് ഇവിടെ വരെ എത്തിയത്. ജീവിക്കാൻ അനുവദിക്കണം," അരുണിമ പറഞ്ഞു. നിയമപരമായ തടസ്സങ്ങൾ നീങ്ങിയതോടെ അരുണിമയുടെ തിരഞ്ഞെടുപ്പ് പ്രചാരണം ശക്തമാകും.