തൃശൂർ: തൃശൂരിൽ ബൈക്ക് യാത്രക്കാരനായ കളക്ഷൻ ഏജന്റിനെ ആക്രമിച്ച് കാറിലെത്തിയ സംഘം മൂന്ന് ലക്ഷം രൂപ തട്ടിയെടുത്തു. ഇന്ന് ഉച്ചയ്ക്ക് 12 മണിയോടെ അന്തിക്കാട് മുറ്റിച്ചൂർ പള്ളിയമ്പലത്തിനു സമീപമാണ് സംഭവം.(Collection agent was chased, pepper sprayed, robbed of Rs 3 lakh, Accused escape in car)
വാടാനപ്പള്ളിയിൽ താമസിക്കുന്ന അക്ഷയ് (30) ആണ് ആക്രമണത്തിന് ഇരയായത്. ഇയാളുടെ ബൈക്കിനെ പിന്തുടർന്ന് കാറിൽ എത്തിയ അക്രമി സംഘം ഇയാളെ തടഞ്ഞുനിർത്തി, തുടർന്ന് മുഖത്തേക്ക് കുരുമുളക് സ്പ്രേ അടിച്ചു.
കയ്യിലുണ്ടായിരുന്ന മൂന്ന് ലക്ഷം രൂപ അടങ്ങിയ ബാഗുമായി അക്രമിസംഘം കാറിൽ കടന്നുകളയുകയായിരുന്നു. പുത്തൻപീടിക ഭാഗത്ത് നിന്ന് പ്രതികൾ തന്നെ പിന്തുടരുന്നുണ്ടായിരുന്നുവെന്ന് അക്ഷയ് പോലീസിനോട് പറഞ്ഞു.
സംഭവത്തിൽ അന്തിക്കാട് പോലീസ് അന്വേഷണം ആരംഭിച്ചു. പ്രദേശത്തെ സി.സി.ടി.വി. ദൃശ്യങ്ങൾ പരിശോധിച്ച് പ്രതികൾ സഞ്ചരിച്ച വാഹനം കണ്ടെത്താനുള്ള ശ്രമത്തിലാണ് പോലീസ്. പ്രതികളെ എത്രയും പെട്ടെന്ന് പിടികൂടാനുള്ള ഊർജിത ശ്രമങ്ങൾ തുടരുകയാണ്.