കൊച്ചി: സിഎംആർഎൽ മാസപ്പടി വിവാദത്തിൽ സിബിഐ അന്വേഷണം ആവശ്യപ്പെട്ടുള്ള ഹർജി ഹൈക്കോടതി ഇന്ന് വീണ്ടും പരിഗണിക്കും. ജസ്റ്റിസ് അഹമ്മദ് മുസ്താഖിന്റെ ബെഞ്ചാണ് കേസ് പരിഗണിക്കുന്നത്. മുഖ്യമന്ത്രി പിണറായി വിജയൻ, മകൾ വീണ, എക്‌സാലോജിക് സൊല്യൂഷൻസ്, സിഎംആർഎൽ ഉടമകൾ എന്നിവരാണ് കേസിലെ എതിർകക്ഷികൾ.(CMRL case, High Court to consider plea seeking CBI probe again today)
ഹർജി ഹൈക്കോടതി പരിഗണിക്കുന്നതിന് മുന്നോടിയായി മുഖ്യമന്ത്രി പിണറായി വിജയനെതിരെ രൂക്ഷ വിമർശനവുമായി മാത്യു കുഴൽനാടൻ എംഎൽഎ രംഗത്തെത്തി. "മടിയിൽ കനമില്ല, തന്റെ കൈകൾ ശുദ്ധമാണ് എന്ന് പറയുന്ന മുഖ്യമന്ത്രി എന്തിനാണ് അന്വേഷണത്തെ എതിർക്കുന്നത്? ഭയപ്പെടുന്നത്?"
തനിക്കെതിരെ പിണറായി വിജയൻ സർക്കാർ വിജിലൻസ് അന്വേഷണം പ്രഖ്യാപിച്ചു എന്ന വാർത്ത വന്നപ്പോൾ താൻ ഏത് അന്വേഷണത്തെയും സ്വാഗതം ചെയ്യുകയായിരുന്നു എന്നും, കോടതിയിൽ പോകുമെങ്കിലും അന്വേഷണവുമായി സഹകരിക്കുന്നുണ്ടെന്നും മാത്യു കുഴൽനാടൻ ചൂണ്ടിക്കാട്ടി.
സിഎംആർഎൽ മാസപ്പടി കേസിൽ നേരത്തെ വിജിലൻസ് അന്വേഷണം ആവശ്യപ്പെട്ടുള്ള ഹർജി കോടതി തള്ളിയിരുന്നു. തുടർന്നാണ് കേസിൽ സിബിഐ അന്വേഷണം ആവശ്യപ്പെട്ട് ഹൈക്കോടതിയെ സമീപിച്ചത്.