കോഴിക്കോട്: നടക്കാവിലെ ഒരു ഹോട്ടലിൽ ബീഫ് ഫ്രൈയെ ചൊല്ലി യുവാക്കൾ തമ്മിൽ സംഘർഷമുണ്ടായി. ഹോട്ടലിലെത്തിയ സംഘം മറ്റൊരു സംഘത്തോട് ബീഫ് ഫ്രൈ വാങ്ങി നൽകണമെന്ന് ആവശ്യപ്പെട്ടതാണ് പ്രകോപന കാരണം.
ഹോട്ടലിൽ എത്തിയ ആദ്യ സംഘം പിന്നാലെയെത്തിയ സംഘത്തോട് ബീഫ് ഫ്രൈ വാങ്ങി നൽകാൻ ആവശ്യപ്പെട്ടു.വാങ്ങി നൽകാനാകില്ലെന്ന് മറുപടി ലഭിച്ചതോടെ വാക്കേറ്റമായി. ഇതോടെ ഹോട്ടലിൽ നിന്നിറങ്ങാൻ ജീവനക്കാർ ആവശ്യപ്പെട്ടു.ഹോട്ടലിന് പുറത്തിറങ്ങിയ ഇരുകൂട്ടരും തമ്മിൽ തുടർന്ന് ഏറ്റുമുട്ടുകയായിരുന്നു.
സംഭവമറിഞ്ഞ് പോലീസ് എത്തിയിട്ടും യുവാക്കൾ തമ്മിലുളള ഏറ്റുമുട്ടൽ തുടർന്നു.സംഘർഷത്തിനിടയിൽ ഒരു യുവാവ് ബോധരഹിതനായി വീണു. പരിക്കേറ്റ ഇദ്ദേഹത്തെ ആംബുലൻസിൽ ആശുപത്രിയിലേക്ക് മാറ്റി.ബോധരഹിതനായ യുവാവിനെ നീക്കിയ ശേഷം പോലീസ് മറ്റു യുവാക്കളെ കസ്റ്റഡിയിലെടുത്ത് സ്റ്റേഷനിലേയ്ക്ക് കൊണ്ടുപോകുകയായിരുന്നു.
സംഘർഷത്തെ തുടർന്ന് അരമണിക്കൂറിലധികം നഗരത്തിൽ ഗതാഗതം സതംഭിച്ചു.അതേസമയം, യുവാക്കൾക്കെതിരെ കേസെടുത്തിട്ടില്ലെന്നാണ് വിവരം.