തിരുവനന്തപുരം: ക്രിസ്മസ്, പുതുവത്സര അവധിക്കാലത്തെ യാത്രാ തിരക്ക് പരിഗണിച്ച് കേരളത്തിലേക്ക് 10 സ്പെഷ്യൽ ട്രെയിനുകൾ കൂടി അനുവദിച്ചതായി കേന്ദ്ര റെയിൽവേ മന്ത്രാലയം അറിയിച്ചു. ഈ 10 ട്രെയിനുകളിലായി ആകെ 38 സർവീസുകൾ നടത്തുമെന്ന് കേന്ദ്രമന്ത്രി ജോർജ് കുര്യൻ വ്യക്തമാക്കി. സ്പെഷ്യൽ സർവീസുകൾ അനുവദിച്ച കേന്ദ്ര റെയിൽവേ മന്ത്രി അശ്വിനി വൈഷ്ണവിന് ജോർജ് കുര്യൻ നന്ദി അറിയിച്ചു.(Christmas - New Year rush, Railways allocates 10 special trains to Kerala)
മുംബൈ, ഡൽഹി, ഹുബ്ളി, ബെംഗളൂരു, വഡോദര തുടങ്ങിയ പ്രധാന നഗരങ്ങളിൽ നിന്നാണ് കേരളത്തിലേക്ക് സ്പെഷ്യൽ ട്രെയിനുകൾ സർവീസ് നടത്തുക. തിരുവനന്തപുരം, എറണാകുളം, കൊല്ലം തുടങ്ങിയ പ്രധാന റെയിൽവേ സ്റ്റേഷനുകളിലേക്കാണ് ഈ അധിക ട്രെയിനുകൾ ഓടുക. ഇൻഡിഗോ വിമാനസർവീസുകളിലെ പ്രതിസന്ധി ഉൾപ്പെടെ നിലനിൽക്കുന്ന സാഹചര്യത്തിൽ, സ്പെഷ്യൽ ട്രെയിനുകൾ മലയാളികൾക്ക് വലിയ ആശ്വാസമാകും.
പൊതുവെ അവധിക്കാലങ്ങളിൽ അന്തർ സംസ്ഥാന സർവീസുകൾ നടത്തുന്ന സ്വകാര്യ ബസുകൾ ടിക്കറ്റ് നിരക്ക് കുത്തനെ വർദ്ധിപ്പിക്കുന്നത് പതിവാണ്. ഈ സാഹചര്യത്തിൽ, റെയിൽവേയുടെ ഈ പ്രത്യേക സർവീസുകൾ യാത്രാക്ലേശം ഒരു പരിധി വരെ കുറയ്ക്കുന്നതിനും യാത്രാക്കൂലി വർധന തടയുന്നതിനും സഹായകമാകും.