തിരുവനന്തപുരം: അന്തരിച്ച മുൻ മുഖ്യമന്ത്രി വി.എസ്. അച്യുതാനന്ദന് എതിരായ ക്യാപിറ്റൽ പണിഷ്മെന്‍റ് പരാമർശത്തിൽപ്രതികരണവുമായി ചിന്താ ജെറോം. വിവാദ തുറന്നു പറച്ചിൽ നടത്തിയ സുരേഷ് കുറുപ്പിനെ തള്ളിയ ചിന്ത, ആലപ്പുഴ സമ്മേളനത്തിൽ ക്യാപിറ്റൽ പണിഷ്മെന്‍റ് എന്ന വാക്ക് ആരും പറഞ്ഞിട്ടില്ലെന്നും വ്യക്തമാക്കി. എല്ലാ സന്തോഷത്തോടും കൂടി താൻ പങ്കെടുത്ത സമ്മേളനമാണ് അത്. വി.എസിനും പാർട്ടിക്കും ലഭിക്കുന്ന പിന്തുണ കണ്ട് അസ്വസ്ഥമാകുന്നതുകൊണ്ടായിരിക്കാം ഇത്തരം കുപ്രചാരണങ്ങളെല്ലാം മാധ്യമങ്ങളുടെ പിന്തുണയോടെ ഉയർത്തിക്കൊണ്ടുവരുന്നതെന്നും ചിന്ത പറഞ്ഞു.ഒരു ദിനപത്രത്തിന്‍റെ വാരാന്തപതിപ്പിൽ എഴുതിയ ലേഖനത്തിലാണ് സുരേഷ് കുറുപ്പ് തുറന്നുപറച്ചിൽ നടത്തിയത്. 2015 ൽ ആലപ്പുഴയിൽ നടത്തിയ സിപിഎം സംസ്ഥാന സമ്മേളനത്തിനിടെയാണ് സംഭവം. സമ്മേളനത്തിൽ നിന്ന് വി.എസ് ഇറങ്ങിപ്പോയത് ക്യാപിറ്റൽ പണിഷ്മെന്‍റ് പരാമര്‍ശനത്തിന് പിന്നാലെയാണെന്നാണ് ലേഖനത്തിൽ പറയുന്നത്.