തിരുവനന്തപുരം : ശ്രീചിത്ര പുവർ ഹോമിൽ മൂന്ന്‌ പെൺകുട്ടികൾ ആത്മഹത്യക്ക്‌ ശ്രമിച്ച സംഭവത്തിൽ ബാലാവകാശ കമീഷൻ സ്വമേധയ കേസെടുത്തു.
കമീഷൻ അംഗം എൻ സുനന്ദ ഹോം സന്ദർശിക്കുകയും കുട്ടികളുടെ വിവരങ്ങൾ ശേഖരിക്കുകയും ചെയ്തു. വിഷയത്തിൽ സ്വമേധയാ കേസെടുത്ത കമീഷൻ ഹോം സൂപ്രണ്ടിനോടും സിഡബ്ല്യൂസിയോടും പൊലീസിനോടും അടിയന്തര റിപ്പോർട്ടു തേടി.
ഞായർ രാത്രി എട്ടോടെയാണ്‌ പുവർ ഹോമിലെ മൂന്ന്‌ പെൺകുട്ടികൾ ആത്മഹത്യയ്ക്ക്‌ ശ്രമിച്ചത്.രണ്ടാഴ്ച മുമ്പ് പുവര്‍ ഹോമിലെത്തിയ ആറ്, പത്ത് ക്ലാസുകളിൽ പഠിക്കുന്ന വിദ്യാർഥികളാണ് ഇവര്‍. അന്തേവാസികളായ മറ്റു ചില കുട്ടികള്‍ കളിയാക്കിയത് മാനസിക വിഷമത്തിനിടയാക്കിയെന്ന് പെണ്‍കുട്ടികള്‍ പറഞ്ഞു.
കുട്ടികൾ പാരസെറ്റമോളും വൈറ്റമിൻ ഗുളികകളും കഴിച്ച് ആത്മഹത്യക്ക്‌ ശ്രമിച്ചത്. സംശയം തോന്നിയ കെയർടേക്കർ ചോദിച്ചപ്പോഴാണ്‌ ഗുളിക കഴിച്ച വിവരം പുറത്തുപറയുന്നത്‌. ഉടനെ മെഡിക്കൽകോളേജ്‌ ആശുപത്രിയിൽ എത്തിച്ചു. നിലവിൽ ആശുപത്രിയിൽ ചികിത്സയിലുള്ള മൂന്നു പെണ്‍കുട്ടികളുടെയും ആരോഗ്യനില തൃപ്തികരമാണ്.