തിരുവനന്തപുരം: ശബരിമലയിലെ സ്വർണക്കൊള്ളയുമായി ബന്ധപ്പെട്ട് കേന്ദ്ര ഏജൻസികളുടെ അന്വേഷണം ആവശ്യപ്പെട്ട് ബി.ജെ.പി. സംസ്ഥാന അധ്യക്ഷൻ രാജീവ് ചന്ദ്രശേഖർ കേന്ദ്ര ആഭ്യന്തരമന്ത്രിക്ക് കത്തയച്ചു. ശബരിമലയിലെ കഴിഞ്ഞ 30 വർഷത്തെ സ്വർണ്ണ ഇടപാടുകൾ സമഗ്രമായി അന്വേഷിക്കണമെന്നാണ് പ്രധാന ആവശ്യം. ഇതുവരെ പുറത്തുവന്ന അന്വേഷണ വിവരങ്ങൾ ഞെട്ടിപ്പിക്കുന്നതാണെന്നും വിശ്വാസികൾക്ക് ആത്മവിശ്വാസം ഉറപ്പാക്കാൻ ശക്തമായ അന്വേഷണം വേണമെന്നും രാജീവ് ചന്ദ്രശേഖർ ആവശ്യപ്പെട്ടു.(Central agency should investigate Sabarimala gold theft, Rajeev Chandrasekhar writes to Union Home Minister)
ദേവസ്വം ബോർഡ് അധികൃതരുടെ പങ്ക് അന്വേഷിക്കണം: ഹൈക്കോടതി
ശബരിമല സ്വർണക്കൊള്ളയിൽ ദേവസ്വം ബോർഡ് അധികൃതരുടെ പങ്കും ഗൂഢാലോചനയും അന്വേഷിക്കണമെന്ന് ഹൈക്കോടതി നേരത്തെ നിർദേശിച്ചിരുന്നു. സ്വർണപ്പാളികൾ ഉണ്ണികൃഷ്ണൻ പോറ്റിക്ക് നൽകിയതിനെതിരെ നിലവിലെ ദേവസ്വം ബോർഡിനെതിരെ രൂക്ഷമായ വിമർശനങ്ങളാണ് ഹൈക്കോടതി നടത്തിയത്.
2019-ലെ സ്വർണക്കൊള്ള മറച്ചുവെക്കാനാണോ ഉണ്ണികൃഷ്ണൻ പോറ്റിക്ക് വീണ്ടും ദ്വാരപാലക ശിൽപങ്ങൾ നൽകിയതെന്ന് എസ്.ഐ.ടി. (പ്രത്യേക അന്വേഷണ സംഘം) അന്വേഷിക്കണം. കൂടാതെ, തിരുവിതാംകൂർ ദേവസ്വം ബോർഡിന്റെ മിനുട്സ് ബുക്ക് പിടിച്ചെടുത്ത് സൂക്ഷിക്കാനും ഹൈക്കോടതി ഉത്തരവിട്ടു.
ഹൈക്കോടതി നിരീക്ഷണങ്ങൾ
2019-ൽ ദ്വാരപാലക ശിൽപങ്ങളിലെ സ്വർണപ്പാളികൾ ഉണ്ണികൃഷ്ണൻ പോറ്റിക്ക് നൽകിയത് മുതലുള്ള ക്രിമിനൽ ഗൂഢാലോചന അന്വേഷിക്കണം. ദ്വാരപാലക ശിൽപങ്ങളുടെ പാളികൾ സ്വർണം പൊതിഞ്ഞതാണെന്നറിഞ്ഞിട്ടും 'ചെമ്പുപാളികൾ' എന്ന് രേഖപ്പെടുത്തി പോറ്റിക്ക് നൽകി. തിരിച്ചെത്തിയപ്പോൾ തൂക്കം രേഖപ്പെടുത്തിയില്ല. കൊണ്ടുപോയ പാളികൾ തന്നെയാണോ തിരിച്ചെത്തിയതെന്ന് സംശയമുണ്ട്.
ഉയർന്ന ദേവസ്വം അധികൃതർക്ക് ഇതിൽ ഉത്തരവാദിത്തമുണ്ട്. 2021-ൽ പീഠം തിരികെ കൊണ്ടുവന്നപ്പോൾ തിരുവാഭരണം രജിസ്റ്ററിൽ രേഖപ്പെടുത്താത്തത് യാദൃശ്ചികമല്ല. 40 വർഷം വാറന്റിയുണ്ടെന്ന് പറഞ്ഞ ഗോൾഡ് പ്ലേറ്റിംഗിൽ 2024-ൽ മങ്ങൽ കണ്ടപ്പോൾ, വീണ്ടും സ്വർണം പൂശാൻ ഉണ്ണികൃഷ്ണൻ പോറ്റിയെ തന്നെ ഏൽപ്പിച്ചത് 2019-ലെ ക്രമക്കേട് മറയ്ക്കാൻ ആണോയെന്ന് സംശയിക്കണം.
സ്മാർട്ട് ക്രിയേഷൻസിന് സ്വർണം പൂശുന്നതിൽ വൈദഗ്ധ്യമില്ലെന്ന് 2025-ൽ നിലപാടെടുത്ത ദേവസ്വം കമ്മീഷണർ, എട്ട് ദിവസത്തിനുശേഷം നിലപാട് മാറ്റി. ദേവസ്വം ബോർഡ് പ്രസിഡന്റ് പി.എസ്. പ്രശാന്തിന്റെ നിർദേശത്തെ തുടർന്നായിരുന്നു ഇത്. ഇതും അന്വേഷിക്കണം. കേസിന്റെ ഗൗരവം പരിഗണിച്ച് ദേവസ്വം ബോർഡ് അധികൃതരുടെയും മുകളിൽ നിന്ന് താഴേക്കുള്ള മുഴുവൻ ഉദ്യോഗസ്ഥരുടെയും പങ്ക് അന്വേഷിക്കണമെന്നും ഹൈക്കോടതി നിർദേശിച്ചു.