കാസർഗോഡ്: ദേശീയപാത 66-ൽ പോത്തിൻകൂട്ടമെത്തിയതിനെ തുടർന്ന് ഗതാഗതം പൂർണ്ണമായും തടസ്സപ്പെട്ടു. മൊഗ്രാലിലെ സർവീസ് റോഡിൽ നിന്നുമാണ് പോത്തുകൾ കൂട്ടത്തോടെ ദേശീയപാതയിലേക്ക് കയറിയത്. ഇതോടെ മണിക്കൂറുകളോളം വാഹനഗതാഗതം നിലച്ചു. പോത്തിൻകൂട്ടത്തെ റോഡിൽ നിന്ന് മാറ്റാനും ഗതാഗതം പുനഃസ്ഥാപിക്കാനുമായി ദേശീയപാത സുരക്ഷാ വിഭാഗവും അഗ്നിരക്ഷാസേനയും ചേർന്ന് സംയുക്ത പ്രവർത്തനം ആരംഭിച്ചു.(Cattle herd obstructs traffic on Kasaragod National Highway 66)
നിലവിൽ പോത്തുകളെ റോഡിൽ നിന്ന് മാറ്റി അണങ്കൂർ ഭാഗത്തെ സർവീസ് റോഡിലേക്ക് വഴിതിരിച്ചുവിടാനുള്ള ശ്രമങ്ങളാണ് പുരോഗമിക്കുന്നത്. ഉടൻ തന്നെ പോത്തുകളെ ദേശീയപാതയിൽ നിന്ന് മാറ്റുമെന്നും ഗതാഗതം പുനഃസ്ഥാപിക്കുമെന്നും ബന്ധപ്പെട്ട വൃത്തങ്ങൾ അറിയിച്ചു.
അതേസമയം, പോത്തിൻകൂട്ടത്തിന്റെ ഉടമസ്ഥനെ ഇതുവരെയും കണ്ടെത്താൻ സാധിച്ചിട്ടില്ല. റോഡിൽ അലഞ്ഞുതിരിയുന്ന കന്നുകാലികൾ ദേശീയപാതയിലെ ഗതാഗതത്തിന് നിരന്തരം ഭീഷണിയാകുന്ന സാഹചര്യമാണ് നിലനിൽക്കുന്നത്.