കൊല്ലം: സമൂഹത്തിൽ സ്പർധ വളർത്താൻ ശ്രമിച്ചെന്ന ആരോപണത്തിൽ സി.പി.എം നേതാവ് ചിന്ത ജെറോമിനെ ഒന്നാം പ്രതിയാക്കി ഇരവിപുരം പോലീസ് കേസെടുത്തു (Chintha Jerome Slogan Case). കോൺഗ്രസ് കൊല്ലൂർവിള മണ്ഡലം കമ്മിറ്റി പ്രസിഡന്റ് റിയാസുദ്ദീൻ റാവുത്തർ നൽകിയ പരാതിയിലാണ് നടപടി. ചിന്തയ്ക്ക് പുറമെ തിരിച്ചറിയാത്ത 55 പേർക്കെതിരെയും കേസെടുത്തിട്ടുണ്ട്.
മന്ത്രി വീണാ ജോർജിന് നേരെയുണ്ടായ കെ.എസ്.യു പ്രതിഷേധത്തിന് പിന്നാലെ ഡി.വൈ.എഫ്.ഐ കൊല്ലം ഈസ്റ്റ് ബ്ലോക്ക് കമ്മിറ്റി സംഘടിപ്പിച്ച പ്രതിഷേധ ജാഥയിലാണ് വിവാദ സംഭവമുണ്ടായത്. ജാഥയിൽ ചിന്ത ജെറോം അസഭ്യവും സ്ത്രീവിരുദ്ധവുമായ മുദ്രാവാക്യങ്ങൾ ഏറ്റുവിളിച്ചെന്നാണ് പരാതി. ബോധപൂർവ്വം സമൂഹത്തിൽ കലഹം സൃഷ്ടിക്കണമെന്ന ഉദ്ദേശത്തോടെ സംഘം ചേർന്ന് പ്രതിഷേധം നടത്തിയെന്ന് എഫ്.ഐ.ആറിൽ പറയുന്നു.
പ്രതിഷേധ പ്രകടനത്തിനിടെ ചിന്ത മുദ്രാവാക്യം വിളിക്കുന്ന ദൃശ്യങ്ങൾ സോഷ്യൽ മീഡിയയിൽ വ്യാപകമായി പ്രചരിക്കുകയും വിമർശനം ഉയരുകയും ചെയ്തിരുന്നു. ഇതേത്തുടർന്ന് ചിന്ത ജെറോം വിശദീകരണവുമായി രംഗത്തെത്തിയിരുന്നുവെങ്കിലും കോൺഗ്രസ് പരാതിയിൽ ഉറച്ചുനിൽക്കുകയായിരുന്നു.
സംഭവത്തിൽ പോലീസ് കൂടുതൽ അന്വേഷണം നടത്തിവരികയാണ്. വീഡിയോ ദൃശ്യങ്ങൾ പരിശോധിച്ച് മുദ്രാവാക്യത്തിലെ നിയമവിരുദ്ധമായ കാര്യങ്ങൾ പോലീസ് സ്ഥിരീകരിക്കും.
Story Summary:
Police have registered a case against CPM leader Chintha Jerome for allegedly raising provocative and misogynistic slogans during a protest march in Kollam. The protest was organized by DYFI following an attack on Minister Veena George. Chintha is named the first accused in the FIR based on a complaint by Congress leader Riyasuddin Rawther.
