കോഴിക്കോട്: അനാശാസ്യക്കേസിൽ കസ്റ്റഡിയിലെടുത്ത യുവതിയെ കേസിൽ നിന്നൊഴിവാക്കാമെന്ന് പറഞ്ഞ് പല തവണ ലൈംഗികമായി പീഡിപ്പിച്ചുവെന്ന ആരോപണം നേരിടുന്ന വടകര ഡിവൈഎസ്പി എ. ഉമേഷിനെതിരെ ഉടൻ ബലാത്സംഗ കേസ് രജിസ്റ്റർ ചെയ്യും. കൂടാതെ, ഉമേഷിനെതിരെ അച്ചടക്ക നടപടിയും ഉണ്ടാകും. സംഭവവുമായി ബന്ധപ്പെട്ട അന്വേഷണ റിപ്പോർട്ട് ഡി.ജി.പി. നാളെ സർക്കാരിന് സമർപ്പിക്കും. ഡിവൈഎസ്പിക്കെതിരെ സർക്കാർ നടപടിയുണ്ടായ ശേഷമായിരിക്കും പോലീസ് ബലാത്സംഗ കേസ് ഉൾപ്പെടെയുള്ള നിയമനടപടികളിലേക്ക് കടക്കുക.(Case may be filed against Vadakara DYSP, Investigation report to be submitted to the government tomorrow)
കസ്റ്റഡിയിലെടുത്ത യുവതിയെ പീഡിപ്പിച്ച ഡിവൈഎസ്പി എ. ഉമേഷിനെതിരെ ഗുരുതരമായ കണ്ടെത്തലുകളാണ് അന്വേഷണ റിപ്പോർട്ടിലുള്ളത്. ഉമേഷ് വടക്കഞ്ചേരി സി.ഐ. ആയിരുന്നപ്പോൾ മറ്റൊരു കേസിൽ കസ്റ്റഡിയിലെടുത്ത യുവതിയെ പീഡിപ്പിച്ചെന്നും, തുടർന്ന് കേസെടുക്കാതെ വിട്ടയച്ചെന്നുമാണ് റിപ്പോർട്ടിലെ പ്രധാന കണ്ടെത്തൽ. പോലീസെന്ന ഔദ്യോഗിക പദവി ഉമേഷ് ദുരുപയോഗം ചെയ്തുവെന്ന് റിപ്പോർട്ട് വ്യക്തമാക്കുന്നു.
ചെർപ്പുളശ്ശേരി സി.ഐ.യുടെ ആത്മഹത്യാക്കുറിപ്പിലെ ആരോപണമാണ് സംഭവം പുറത്തുവരാൻ കാരണം. അനാശാസ്യ കേസിൽ അറസ്റ്റിലായ യുവതിയെ ഡിവൈഎസ്പി ഭീഷണിപ്പെടുത്തി പീഡിപ്പിച്ചുവെന്ന ആരോപണം സി.ഐ. ബിനുവിന്റെ ആത്മഹത്യാക്കുറിപ്പിൽ ഉണ്ടായിരുന്നു. യുവതിയെ പീഡിപ്പിച്ച വിഷയം പറഞ്ഞ് ഡിവൈഎസ്പി തന്നെ നിരന്തരം മാനസികമായി പീഡിപ്പിക്കുമായിരുന്നുവെന്നും സി.ഐ.യുടെ കുറിപ്പിലുണ്ട്.